6 красавіка, Мінск /Кар. БЕЛТА/. Амерыканскі долар можа ў хуткім часе страціць статус галоўнай сусветнай валюты на фоне палітыкі цяперашніх улад Злучаных Штатаў. Аб гэтым заявіў экс-прэзідэнт ЗША Дональд Трамп, паведамляе ТАСС.
На думку Трампа, амерыканскі долар можа быць выцеснены кітайскім юанем. Пры гэтым яшчэ тры гады таму падобнае было немагчыма ўявіць, адзначыў экс-прэзідэнт.
Трамп лічыць, што калі Джо Байдэн будзе кіраваць Злучанымі Штатамі, долар, хутчэй за ўсё, страціць свае пазіцыі. "Гэта стане самым вялікім паражэннем нашай краіны ў яе гісторыі. Мы станем другаразраднай краінай", - заявіў Трамп.
Раней эканаміст з ЗША Нурыэль Рубіні, які спрагназаваў эканамічны крызіс у 2008 годзе, заявіў, што заняпад долара як сусветнай рэзервовай валюты можа адбыцца ў бліжэйшыя 10 гадоў. Такога ж меркавання прытрымліваецца амерыканскі фінансіст Рэй Даліа. Эксперт прагназуе, што эпоха дамінавання долара завяршаецца.-0-
