18 мая, Мінск /Кар. БЕЛТА/. У Дзяржаўнай думе Расійскай Федэрацыі прапанавалі забараніць польскім грузаперавозчыкам праезд па тэрыторыі Расіі, паведамляе газета "Известия".
Паводле даных выдання, аўтарам ініцыятывы выступіў старшыня камітэта Дзярждумы па транспарце і развіцці транспартнай інфраструктуры Яўген Масквічоў.
"Тэрмінова з 1 чэрвеня прашу, каб урад Расійскай Федэрацыі ўнёс папраўкі ў пастанову нумар 1728, якія забараняюць польскім аўтатранспартным кампаніям выконваць імпартна-экспартныя грузаперавозкі па тэрыторыі РФ", - заявіў дэпутат.
Як удакладняецца, прапанаваная ім мера прадугледжвае, што польскім грузаперавозчыкам будзе дазволена ўязджаць у Расію толькі да бліжэйшага да граніцы тэрмінала для выгрузкі грузу або яго перачэпкі на расійскія фуры. Акрамя таго, прадугледжваецца ўвядзенне павышанага кошту дызельнага паліва для запраўкі польскіх фур на АЗС у Расіі. На думку Масквічова, "запраўляць фуры польскіх перавозчыкаў варта па цэнах у 1,5-2 разы вышэйшых за звычайныя расійскія".
Такую ініцыятыву Масквічоў агучыў у адказ на антырасійскія дзеянні Польшчы па захопе будынка расійскай школы пры пасольстве РФ у Варшаве 29 красавіка, калі польскія ўлады пачалі працэдуру канфіскацыі будынка школы сілавым метадам. У сувязі з інцыдэнтам пасольства Расіі перадало Польшчы ноту пратэсту.
Палітык адзначыў, што ўжо абмяркоўваў сваю прапанову з прадстаўнікамі Мінтранса, МЗС і Дэпартамента транспарту Апарату ўрада РФ.-0-
