25 мая, Мінск /Кар. БЕЛТА/. Супрацоўнікі ФСБ прадухілілі тэрарыстычныя акты на аб'ектах ядзернай энергетыкі Расіі, якія рыхтавалі спецслужбы Украіны. Па падазрэнні ў прыналежнасці да злачынстваў затрыманы члены дыверсійнай групы, а таксама ўстаноўлены іх саўдзельнікі, піша газета "Известия".
Паводле прадстаўленай інфармацыі расійскай спецслужбы, дыверсійна-тэрарыстычная група (ДТГ) Службы знешняй разведкі Украіны (СЗРУ) напярэдадні святкавання Дня Перамогі планавала падарваць больш за 30 апор высакавольтных ліній электраперадачы Ленінградскай і Калінінскай атамных электрастанцый. У выпадку поспеху гэта прывяло б да спынення ядзерных рэактараў, парушэння работы АЭС.
Як расказаў адзін з супрацоўнікаў ФСБ, дыверсантам удалося падарваць адну і замініраваць чатыры апоры ЛЭП Ленінградскай АЭС і закласці самаробнае ўзрыўное ўстройства пад сем апор Калінінскай АЭС.
Супрацоўнікамі ФСБ затрыманы два грамадзяніны Украіны: Аляксандр Майструк (мянушка Механік) і Эдуард Усаценка (мянушка Макс). Таксама ў розыск аб'яўлены грамадзянін Украіны і Расіі Юрый Кішчак (псеўданім ЮБК), які знаходзіцца ў Бельгіі. Усе названыя грамадзяне былі завербаваны восенню 2022 года супрацоўнікам СЗРУ Віталём Гарбацюком і прайшлі спецпадрыхтоўку.
Акрамя таго, устаноўлены і затрыманы памагатыя дыверсантаў. Гэта расійскія грамадзяне, якія забяспечвалі іх тэлефонамі і транспартам з падробленымі нумарамі.
Паводле атрыманай інфармацыі, з мэтай учынення тэрактаў дыверсанты перасяклі расійскую граніцу ў Пскоўскай вобласці. Далей выбуховае рэчыва было перавезена ў Расію кантрабандай з польскага горада Хелм у Літву, а потым у Беларусь. У выніку ўзрыўчатка была дастаўлена ў Ржэўскі раён Цвярской вобласці.
Тайнік для ўзрыўчаткі быў абсталяваны ў грузавым прычэпе.
Праваахоўнікі канфіскавалі ў зламыснікаў 36,5 кг пластыду, які выкарыстоўваецца для амерыканскай узрыўчаткі С-4, 61 дэтанатар, 38 электронных таймераў і два пісталеты ПМ з патронамі.
Адносна затрыманых узбуджаны крымінальныя справы. У ходзе следчых дзеянняў фігуранты прызналіся ў супрацоўніцтве з украінскімі спецслужбамі.-0-
