19 красавіка, Мінск /Кар. БЕЛТА/. Старшыня Еўрапейскай камісіі Урсула Фон дэр Ляен запатрабавала ад дзяржаў Усходняй Еўропы, у тым ліку ад Польшчы і Венгрыі, захоўваць еўрапейскае адзінства ў сферы гандлю ў сувязі з уведзенай гэтымі краінамі забаронай на імпарт украінскага збожжа. Аб гэтым паведамляе ТАСС са спасылкай на заяву Еўракамісіі.
Кіраўнік ЕК нагадала, што ў Еўрасаюзе створаны адзіны рынак і адзіная мытная прастора. Таму дзяржавы ЕС павінны прытрымлівацца агульнага еўрапейскага падыходу пры прыняцці рашэнняў.
Фон дэр Ляен таксама заявіла, што еўрапейскія фермеры, якія пацярпелі з-за сітуацыі з украінскім збожжам, атрымаюць падтрымку. У Бруселі працуюць над стварэннем праграмы дапамогі фермерам на агульную суму 100 млн еўра. Гэтыя грошы будуць выдзелены пры ўмове, што імпарт збожжа з Украіны прадоўжыцца.
Раней паведамлялася, што ўкраінскае збожжа і некаторая іншая аграрная прадукцыя, якія павінны былі ісці транзітам праз дзяржавы ЕС па так званых калідорах салідарнасці, асядаюць на рынках еўрапейскіх краін. Гэта выклікала абурэнне мясцовых фермераў, якія сутыкнуліся з цяжкасцямі пры рэалізацыі ўласнай аграрнай прадукцыі. У шэрагу краін Усходняй Еўропы прайшлі пратэсты фермераў.
На мінулым тыдні Польшча, Венгрыя, Славакія, Балгарыя, Чэхія і Румынія ініцыявалі стварэнне ў Еўропе адзінага механізма закупкі збожжа з Украіны, а таксама заклікалі ўвесці ў Еўрасаюзе мытныя квоты на аграрную прадукцыю з Украіны.-0-
