7 чэрвеня, Мінск /Кар. БЕЛТА/. Былы віцэ-прэзідэнт Злучаных Штатаў Амерыкі Майк Пенс афіцыйна аб'явіў аб удзеле ў выбарах прэзідэнта краіны ў наступным годзе. Аб гэтым паведамляе ТАСС са спасылкай на распаўсюджаны відэазварот Майка Пенса ў сацсетцы Twitter.
У сваім звароце былы віцэ-прэзідэнт адзначыў, што не можа заставацца ў баку ад таго, што адбываецца. "Я аб'яўляю, што буду ўдзельнічаць у выбарах прэзідэнта ЗША", - заявіў ён.
Майк Пенс абвінаваціў дзеючага кіраўніка дзяржавы Джо Байдэна ў тым, што ён аслабіў краіну як знутры, так і на міжнароднай арэне. Амерыканская мара, паводле яго слоў, сёння знішчана нястрымнай інфляцыяй, на краіну ідзе рэцэсія, зніжаюцца зарплаты.
Былы віцэ-прэзідэнт таксама падкрэсліў, што "розныя часы патрабуюць рознага лідарства". Паводле яго слоў, ЗША сёння патрэбны лідар, "які, як гаварыў Лінкальн, звернецца да лепшых анёлаў нашай прыроды". Майк Пенс упэўнены, што адрадзіць краіну і даць ёй пачатак новага жыцця магчыма. "Мы можам аднавіць нашу эканоміку і вярнуць нашу краіну на шлях збалансаванага бюджэту", - адзначыў ён.
Наступныя выбары прэзідэнта Злучаных Штатаў Амерыкі запланаваны на лістапад 2024 года. У канцы красавіка дзеючы лідар краіны Джо Байдэн заявіў, што будзе вылучацца на новы тэрмін на выбарах кіраўніка дзяржавы ў наступным годзе.-0-
