21 красавіка, Мінск /Кар. БЕЛТА/. Каля паўднёвакарэйскага Ульсана загарэлася расійскае рыбалавецкае судна "Калтан" з Уладзівастока. З яго борта быў эвакуіраваны 21 член экіпажа, яшчэ чацвёра лічацца прапаўшымі без вестак. Паводле інфармацыі выратаваных, прапаўшыя засталіся на судне для тушэння пажару, паведамляе РІА Навіны.
Цяпер прадаўжаецца выратавальная аперацыя і ліквідацыя пажару. Паводле папярэдніх даных Далёкаўсходняй транспартнай пракуратуры, паспяхова эвакуіраваны 21 з 25 членаў экіпажа. Двое з іх атрымалі нязначныя апёкі, астатнія не пацярпелі. 19 членаў экіпажа судна былі дастаўлены на бераг, яшчэ двое дапамагаюць шукаць чацвярых прапаўшых без вестак у выніку надзвычайнай сітуацыі таварышаў.
Экіпаж спрабаваў змагацца з агнём сваімі сіламі, аднак не змог паспяхова ліквідаваць пажар. Капітан даў каманду сысці на выратавальныя плыты: 21 чалавек, у тым ліку ён сам, пакінулі карабель. Старшы памочнік і яшчэ тры члены экіпажа засталіся на борце для барацьбы з пажарам.
РІА Навіны інфармуюць, што для дапамогі расійскім ратавальнікам ваенна-марскія сілы Рэспублікі Карэя адправілі патрульны самалёт, патрульны катар і выратавальны карабель. Паўднёвакарэйскія ваенныя аказваюць падтрымку пошукава-выратавальным работам Расіі. "Для дапамогі расійскаму судну былі таксама мабілізаваны берагавая ахова і пажарныя, усяго 12 катараў і адзін верталёт, а таксама іншыя рыбацкія лодкі, якія знаходзіліся паблізу месца інцыдэнту", - удакладняе газета "Кунмін Ільба".-0-
