12 мая, Мінск /Кар. БЕЛТА/. Новы сезон майстроў пляжнага футбола ў Беларусі адкрыецца ў Кіраўску паядынкам за Суперкубак, паведамляе карэспандэнт БЕЛТА.
У барацьбе за першы трафей сезона сёння пазмагаюцца чэмпіён краіны магілёўскі клуб ЦАР і сярэбраны прызёр мінулага нацыянальнага першынства "Шчучын". Год таму гэтыя каманды таксама змагаліся за Суперкубак, і тады магіляўчане трэці раз сталі яго ўладальнікамі, выйграўшы з лікам 12:4. Да гэтага два сезоны запар першы трафей сезона браў "Гроднааблспорт", які абодва разы перамагаў магіляўчан.
Заўтра таксама ў Кіраўску стартуе 16-ы чэмпіянат Беларусі па пляжным футболе. Акрамя сённяшніх саіскальнікаў Суперкубка, у турніры выступяць "Гроднааблспорт", "Брэст-Волга", "Рэгула" з Мінска, віцебскі "Юркас" і "ФСК-Меліяратар" з Астраўца. Матчы другога тура пройдуць у Мінску 9-10 чэрвеня, трэці тур прыме Гродна (24-25 чэрвеня), заключны тур і суперфінал пройдзе ў Шчучыне (8-9 ліпеня). Вырашальны этап розыгрышу Кубка Беларусі адбудзецца ў пачатку верасня.
У гэтым сезоне нацыянальная зборная Беларусі, якую ўзначальвае вядомы іспанскі спецыяліст Нікалас Альварада, прыме ўдзел у шэрагу міжнародных турніраў. Сярод галоўных з іх - II Гульні краін СНД, якія пройдуць у Беларусі ў жніўні.-0-
