12 красавіка, Мінск /Кар. БЕЛТА/. У беларускай хакейнай экстралізе стартуе вырашальная серыя сезона-2022/23 - фінал Кубка Прэзідэнта, паведамляе карэспандэнт БЕЛТА.
Да фіналу экстралігі ў гэтым годзе дабраліся гродзенскі "Нёман", які заняў другое месца ў рэгулярным чэмпіянаце, і дзеючы чэмпіён краіны жлобінскі "Металург". Па ходзе плэй-оф гродзенцы выбілі з барацьбы за трафей "Хімік" з Наваполацка (4:0 у серыі) і сталічнае "Юнацтва" (4:3), прычым у дуэлі з мінчанамі "Нёман" упершыню ў гісторыі беларускага хакея адыграўся з ліку 0:3 у серыі. "Металург", у сваю чаргу, у першым раўндзе прайшоў ХК "Гомель" (4:2), а ў паўфінале не пакінуў шанцаў лепшай камандзе "рэгуляркі" - салігорскаму "Шахцёру" (4:1).
Хакеісты "Нёмана" і "Металурга" сустракаліся ў фіналах экстралігі двойчы. У сезоне-2011/12 Кубак Прэзідэнта дастаўся жлабінчанам, праз год гродзенцы ўзялі рэванш. Усяго "Нёман" станавіўся чэмпіёнам Беларусі сем разоў, у "стальных ваўкоў" - два трафеі, другі з іх заваяваны ў мінулагоднім розыгрышы. Першы матч фінальнай серыі Кубка Прэзідэнта сезона 2022/23 пачнецца сёння ў 19.30, другая гульня адбудзецца ў пятніцу таксама ў Гродне. Далей каманды пераедуць ў Жлобін, дзе правядуць яшчэ дзве сустрэчы 16 і 18 красавіка. Пры неабходнасці пяты, шосты і сёмы матчы будуць згуляны 20, 22 і 24 красавіка.-0-
