28 верасня, Мінск /Кар. БЕЛТА/. Ігракі мінскага "Дынама" сёння завершаць чарговую выязную серыю ў рамках рэгулярнага чэмпіянату КХЛ матчам супраць хакейнага клуба "Сочы", паведамляе карэспандэнт БЕЛТА.
Сочынцы на гэты момант з'яўляюцца аднымі з галоўных няўдачнікаў бягучага сезона: у каманды Андрэя Назарава 9 паражэнняў у 10 матчах і апошняе месца на Захадзе. Справы ў "зуброў" ідуць намнога лепш: з 14 баламі дынамаўцы размяшчаюцца на 6-й пазіцыі ў сваёй канферэнцыі. Праўда, бягучая выязная серыя складваецца для мінчан няпроста, у ходзе турнэ "бела-блакітныя" прайгралі "Салавату Юлаеву" (2:3, бул) і "Металургу" (1:4). Ігракі ж сочынскага клуба ў папярэдняй гульні ўпершыню за шэсць сустрэч набралі ачкі, уступіўшы ў авертайме "Амуру" (1:2). Лепшым бамбардзірам "Дынама" з'яўляецца нападаючы Раян Спунер, у актыве якога 10 (7+3) ачкоў, у складзе "леапардаў" ніводны хакеіст не мае больш за пяць рэзультатыўных балаў.
У мінулым сезоне КХЛ каманды правялі паміж сабой два паядынкі: першы матч упэўнена забралі падапечныя Вудкрафта - 7:3, у другім мацнейшымі былі ўжо сочынцы (4:3). Чарговая сустрэча "Дынама" і "Сочы" пройдзе ў Палацы спорту і стартуе ў 19.30.-0-
