20 красавіка, Мінск /Кар. БЕЛТА/. На жаночым чэмпіянаце Беларусі па гандболе адбыліся першыя сустрэчы чвэрцьфінальнай стадыі, паведамляе карэспандэнт БЕЛТА.
Гандбалісткі гродзенскай "Гараднічанкі" ва ўпартай барацьбе перайгралі на выездзе "Віцябчанку" з перавагай два мячы - 30:28. У Бабруйску мясцовая "Бярэзіна" з мінімальнай перавагай перамагла гасцей з брэсцкага клуба "Вікторыя-Бярэсце" - 33:32. Паядынкі ў адказ серый да дзвюх перамог адбудуцца 26 красавіка ў Гродне і Віцебску. Пераможцы чвэрцьфінальных баталій згуляюць у паўфінале з лідарамі рэгулярнага сезона "Гомелем" і "БНТУ-БелАЗам".
На мужчынскім першынстве склады паўфінальных пар ужо вядомы: дзеючы чэмпіён "Мяшкоў Брэст" будзе сапернічаць з гандбалістамі "Гомеля", а віцэ-чэмпіён Беларусі мінскі СКА праэкзаменуе свой фарм-клуб БДУФК-СКА. Паўфінальныя серыі стартуюць 10 мая і прадоўжацца да дзвюх вікторый адной з каманд. Да гэтага ў Брэсце пройдзе вырашальны этап розыгрышу Кубка Беларусі. У паўфіналах 5 мая "Мяшкоў Брэст" сустрэнецца з БДУФК-СКА, а СКА згуляе з "Гомелем". Пераможцы гэтых гульняў паспрачаюцца за галоўны трафей, каманды, якія прайграюць, пазмагаюцца за бронзу.-0-
