14 красавіка, Мінск /Кар. БЕЛТА/. У апошнія гады беларускі футбол страціў многае з набытага ў савецкія часы. Каб узняцца на новы ўзровень, трэба ўспомніць лепшыя традыцыі і пастарацца прымяніць іх у сучасных умовах. Такое меркаванне выказаў вядомы беларускі трэнер Павел Раднёнак у інтэрв'ю новаму спартыўнаму сайту Sports5.by, паведамляе БЕЛТА.
Спецыяліст адзначыў, што ў Савецкім Саюзе функцыянавала адладжаная сістэма: "У кожнай ЖЭС была футбольная каманда, у кожным мікрараёне Мінска функцыянавала ДЮСШ. Я, дапусцім, у ЖЭС гуляў у калектыве "Бярозка", потым выступаў за "Трактар" у ДЮСШ. І былі дзве элітныя каманды СДЮШАР-5 і СДЮШАР "Дынама-Мінск". Не ўлічваючы ўсялякіх зборных школьных спаборніцтваў, каманд горада, рэспублікі. Усе школьнікі маглі займацца футболам проста побач з домам - у кожным двары былі футбольныя пляцоўкі, дзе з раніцы да ночы хлопцы ганялі мяч. Пастаянна праводзіліся не толькі турніры тыпу "Скуранога мяча", але і проста імправізаваныя баталіі вуліца на вуліцу, двор на двор. Цяпер мы гэта, на жаль, страцілі".
Ён таксама нагадаў, што склады каманд-майстроў у тым ліку папаўняліся менавіта з "неарганізаваных" юных ігракоў, а не толькі з выхаванцаў спартыўных школ. "Каб прабіцца ў футбольны клуб вышэйшай лігі, ты праходзіў скрозь шматлікае сіта ўсялякіх адборачных спаборніцтваў. Зборныя горада і зборныя абласцей гулялі паміж сабой турніры. Потым ты трапляеш у зборную рэспублікі. І быў чэмпіянат сярод усіх рэспублік, пасля чаго лепшыя адбіраліся ў зборныя Савецкага Саюза. Для таго каб трапіць нават у дубліруючы склад мінскага "Дынама", трэба было мінімум гуляць у зборнай БССР і быць кандыдатам у зборную Савецкага Саюза. Узровень канкурэнцыі быў найвышэйшым", - падкрэсліў Павел Раднёнак, які цяпер працуе ў сталічным "Энергетыку-БДУ". У мінулым годзе гэта маладая каманда ўпершыню змагла падняцца на п'едэстал чэмпіянату Беларусі, сенсацыйна заваяваўшы сярэбраныя медалі.-0-
