29 верасня, Мінск /Кар. БЕЛТА/. Беларускія спартсмены змогуць прыняць удзел у летніх Паралімпійскіх гульнях 2024 года ў Парыжы. Яны будуць выступаць у нейтральным індывідуальным статусе. Такое рашэнне прынята 29 верасня на Генеральнай асамблеі Міжнароднага паралімпійскага камітэта (МПК) у Манаме (Бахрэйн). Аб гэтым карэспандэнту БЕЛТА паведаміў старшыня Паралімпійскага камітэта Беларусі Алег Шэпель, які прымаў удзел у асамблеі.
Алег Шэпель таксама расказаў, што цяпер беларусы змогуць выступаць на ўсіх турнірах пад эгідай МПК. На жаль, Паралімпійскі камітэт Беларусі пакуль не адноўлены ў якасці паўнапраўнага члена МПК. Алег Шэпель адзначыў, што ў беларусаў застаецца права звярнуцца па гэтым пытанні ў незалежны апеляцыйны трыбунал Міжнароднага паралімпійскага камітэта і нямецкі суд, паколькі штаб-кватэра МПК знаходзіцца ў Боне. Кіраўнік камітэта таксама падкрэсліў, што беларусы ніколі не парушалі спартыўныя законы і строга выконваюць усе прынятыя правілы.
Міжнародны паралімпійскі камітэт дазволіў і расіянам прыняць удзел у летняй Паралімпіядзе-2024 у статусе нейтральных спартсменаў.
XVII летнія Паралімпійскія гульні пройдуць у сталіцы Францыі з 28 жніўня па 8 верасня 2024 года.-0-
