11 мая, Мінск /Кар. БЕЛТА/. Юныя беларускія спартсмены атрымалі запрашэнне на VIII Міжнародныя спартыўныя гульні "Дзеці Азіі", якія пройдуць у 2024 годзе ў Якуцку, паведамілі БЕЛТА ў прэс-службе Нацыянальнага алімпійскага камітэта.
Рашэнне аб допуску беларускай каманды на спаборніцтвы ў ходзе пасяджэння прыняло праўленне міжнароднага камітэта гульняў "Дзеці Азіі".
"Беларускія спартсмены паспяхова выступілі на II зімовых гульнях "Дзеці Азіі" ў Кузбасе. Рашэнне праўлення камітэта аб допуску каманды да ўдзелу ў VIII гульнях "Дзеці Азіі" ў Якуцку выклікана тым, што мы прытрымліваемся місіі гульняў, якая заключаецца ў папулярызацыі алімпійскіх каштоўнасцей і развіцці дзіцяча-юнацкага спорту. У дзяцей павінна быць магчымасць спаборнічаць у канкурэнцыі з равеснікамі з іншых краін, паколькі такі вопыт, безумоўна, спатрэбіцца ім у вялікім спорце", - гаворыцца ў паведамленні.
З 23 лютага па 5 сакавіка гэтага года юныя беларускія спартсмены прымалі ўдзел у II зімовых гульнях "Дзеці Азіі", дзе заваявалі 11 медалёў (1 залаты, 5 сярэбраных і 5 бронзавых). Летнія спартыўныя гульні "Дзеці Азіі" праводзяцца кожныя чатыры гады пачынаючы з 1996 года.-0-
