21 красавіка, Мінск /Кар. БЕЛТА/. У Палацы водных відаў спорту ў Казані завяршыўся чэмпіянат Расіі па плаванні з удзелам беларускіх спартсменаў, паведамляе карэспандэнт БЕЛТА.
У заключны дзень спаборніцтваў скарбонка беларускай каманды папоўнілася трыма медалямі - па адной кожнай вартасці. Перамогу на дыстанцыі 50 м брасам з рэзультатам 26,73 сек. атрымаў Ілья Шымановіч, для якога гэта золата стала другім на турніры пасля поспеху на стаметроўцы. Трэцяе асабістае серабро заваявала Аліна Змушко, на гэты раз наша плыўчыха стала другой у фінале на 200 м брасам. На трэцюю прыступку п'едэстала па выніках мужчынскай камбінаванай эстафеты падняўся беларускі квартэт у складзе Віктара Стасяловіча, Рыгора Пякарскага, Ільі Шымановіча і Руслана Скамарошкі.
Акрамя таго, удзел у пятнічных фіналах прынялі яшчэ трое прадстаўнікоў Беларусі. Настасся Куляшова заняла 4-е месца на стаметроўцы батэрфляем, Іван Шамшурын паказаў 5-ы рэзультат у вырашальным заплыве на 200 м батэрфляем, а Настасся Шкурдай фінішавала 7-й на дыстанцыі 50 м вольным стылем.
Такім чынам, за шэсць дзён чэмпіянату Расіі ў Казані беларускія плыўцы заваявалі дзевяць медалёў - па чатыры залатыя і сярэбраныя, а таксама адзін бронзавы. Акрамя Ільі Шымановіча, двухразовай пераможцай турніру стала Настасся Шкурдай, якая першынствавала на дыстанцыях 100 і 200 м на спіне.-0-
