3 красавіка, Мінск /Кар. БЕЛТА/. Савет Сусветнай федэрацыі тхэквандо (World Taekwondo) абмеркаваў рэкамендацыі МАК для міжнародных федэрацый аб удзеле беларускіх і расійскіх спартсменаў у міжнародных спаборніцтвах, паведамляе БЕЛТА са спасылкай на афіцыйны сайт арганізацыі.
Па выніках абмеркавання, праведзенага ў анлайн-фармаце, Сусветная федэрацыя тхэквандо вырашыла дапусціць беларусаў і расіян у якасці нейтральных атлетаў да ўдзелу ў міжнародных турнірах, пачынаючы з чэмпіянату свету 2023 года, які пройдзе ў Баку ў канцы мая. Рашэнне аб выступленні нейтральных спартсменаў з беларускімі і расійскімі пашпартамі на іншых стартах, што не знаходзяцца пад эгідай World Taekwondo, будзе прынята пасля сусветнага форуму ў Азербайджане.
Савет федэрацыі таксама адобрыў стварэнне Наглядальнага камітэта па верыфікацыі для забеспячэння строгага нейтралітэту выступаючых спартсменаў і дапаможнага персаналу з Беларусі і Расіі. Згодна з заявай World Taekwondo, удзел любых індывідуальных атлетаў у спаборніцтвах, якія праводзяцца арганізацыяй, будзе ажыццяўляцца ў адпаведнасці з дакладнымі прынцыпамі і рэкамендацыямі, устаноўленымі Выканкамам МАК.-0-
