17 студзеня, Мінск /Кар. БЕЛТА/. Беларуская тэнісістка Арына Сабаленка паспяхова стартавала на Australian Open, паведамляе карэспандэнт БЕЛТА.
Мінулай ноччу ў першым раўндзе пятая ракетка планеты ўпэўнена перайграла ў дзвюх партыях чэшку Тэрэзу Марцінцаву, якая займае 74-е месца ў сусветным рэйтынгу, - 6:1, 6:4. Матч прадаўжаўся 1 гадзіну 10 мінут. У 1/32 фіналу Арына Сабаленка сустрэнецца з амерыканкай Шэлбі Роджэрс (51-ы нумар рэйтынгу WTA).
Раней у другі раўнд прабіліся яшчэ дзве прадстаўніцы Беларусі. Двухразовая пераможца Australian Open Вікторыя Азаранка (24) перамагла прадстаўніцу ЗША Сафію Кенін (203) - 6:4, 7:6 (7:3). Наступнай саперніцай беларускі будзе аргенцінская тэнісістка Надзя Падарошка (191). Вікторыя Азаранка выйгравала аўстралійскае першынство ў 2012 і 2013 гадах. Аляксандра Сасновіч (38) у 1/64 фіналу выйграла ў чэшкі Брэнды Фрухвіртавай (136) - 7:5, 6:2, а заўтра згуляе з трэцяй ракеткай свету амерыканкай Джэсікай Пегулай.
Адзіны беларускі прадстаўнік у мужчынскім адзіночным разрадзе Ілья Івашка (73) у першым крузе прайграў нідэрландскаму тэнісісту Боціку ван дэ Зандсхюлпу (34) - 3:6, 6:3, 5:7, 3:6.
Агульны прызавы фонд гэтага аўстралійскага першынства складае $51,5 млн. Пераможцы ў мужчынскім і адзіночным разрадзе атрымаюць па $2 млн. Турнір на адкрытых хардавых кортах "Мельбурн-Парка" завершыцца 29 студзеня.-0-
