25 ліпеня, Мінск /Кар. БЕЛТА/. У Нацыянальным алімпійскім камітэце Беларусі сёння ўшаноўвалі чэмпіёнаў і прызёраў летняй Алімпіяды ў Барселоне-1992, перадае карэспандэнт БЕЛТА.
Прэзідэнт НАК Віктар Лукашэнка адзначыў, што вельмі рады сустрэцца з сапраўднымі легендамі беларускага спорту. "Вы прыйшлі ў штаб-кватэру НАК не як госці, а ў якасці паўнапраўных гаспадароў. Гэта шмат у чым дзякуючы вашым дасягненням беларускі спорт прадаўжае развівацца і цяперашняе пакаленне алімпійцаў раўняецца на вас", - падкрэсліў Віктар Лукашэнка.
Успамінаючы гульні ў Барселоне, алімпійскі чэмпіён Дзмітрый Даўгалёнак адзначыў іх душэўную атмасферу: "Усе атлеты былі адной сям'ёй, цёпла размаўлялі адзін з адным". Асабліва яму запомнілася алімпійская вёска, мабыць, іспанцы змаглі стварыць самыя камфортныя ўмовы для гасцей і атлетам заставалася толькі паказаць свае лепшыя рэзультаты, сказаў Дзмітрый Даўгалёнак. Яго партнёр па залатым заездзе на каноэ-двойцы Аляксандр Масяйкоў выказаў шкадаванне, што цяпер беларускія атлеты ў сувязі з вядомымі падзеямі аказаліся ў няпростых умовах. Аднак нешта падобнае ўжо было ў 1980 і 1984 гадах. Тады таксама палітыка ўмяшалася ў спорт, што негатыўна паўплывала на алімпійскі рух. Тым не менш, лічыць алімпійскі чэмпіён, усё пройдзе і сусветная алімпійская сям'я зноў стане адзінай. А пакуль ёсць час крыху спыніцца, абдумаць далейшыя планы і добра падрыхтавацца да будучых стартаў.
Канстанцін Лукашык адзначыў, што за мінулыя 30 гадоў ён нячаста ўспамінаў аб сваім алімпійскім золаце: "Часцей аб гэтым нагадваюць сябры, што вельмі прыемна. Таксама прыемна, што і НАК пастаянна выказвае клопат аб алімпійцах, гэта вельмі каштоўна".
Пасля распаду СССР на XXV летніх Алімпійскіх гульнях у Барселоне выступала Аб'яднаная каманда, у якую ўвайшлі прадстаўнікі постсавецкіх краін. Сярод іх было і 54 беларускія спартсмены, якія заваявалі 13 залатых, 4 сярэбраныя і 5 бронзавых узнагарод. Адной з самых яркіх зорак Гульняў-1992 стаў беларускі гімнаст Віталь Шчэрба, які заваяваў 6 залатых алімпійскіх медалёў. Акрамя яго на вышэйшую прыступку п'едэстала гонару ўзнімаліся майстры веславання на байдарках і каноэ Дзмітрый Даўгалёнак і Аляксандр Масяйкоў, цяжкаатлет Аляксандр Курловіч, стралок Канстанцін Лукашык, плыўчыха Алена Рудкоўская, гімнастка Святлана Багінская, баскетбалісткі Ірына Сумнікава і Алена Швайбовіч, гандбалісты Андрэй Барбашынскі, Міхаіл Яхімовіч і Андрэй Мінеўскі. Адкрыццё Гульняў у каталонскай сталіцы адбылося 25 ліпеня, закрыццё - 9 жніўня 1992 года.
Спартсмены Аб'яднанай каманды выступілі толькі на дзвюх алімпіядах - летняй у Барселоне і зімовай у французскім горадзе Альбервіль.-0-
