31 сакавіка, Гомель /Кар. БЕЛТА/. У бягучым годзе фармат Паслання Прэзідэнта беларускаму народу і парламенту будзе яшчэ больш глыбокім і аб'ёмным. Такім меркаваннем падзяліўся з карэспандэнтам БЕЛТА старшыня Гомельскай абласной арганізацыі Беларускага прафсаюза работнікаў культуры, інфармацыі, спорту і турызму Міхаіл Жукевіч.
Міхаіл Жукевіч адзначыў, што яму пашчасціла неаднаразова асабіста прысутнічаць у зале пры Пасланні Прэзідэнта. "Кіраўнік дзяржавы ў кожным сваім звароце асвятляў цалкам усе напрамкі жыццядзейнасці, пачынаючы ад эканомікі, міжнароднага парадку дня і заканчваючы грамадскімі аб'яднаннямі. Упэўнены, што і на гэты раз ён не адыдзе ад такога фармату. Адзінае, Пасланне можа стаць яшчэ больш аб'ёмным і яшчэ больш глыбокім, таму што ёсць пра што сказаць. Думаю, што больш увагі наш Прэзідэнт удзеліць эканоміцы, якая сёння працуе ў санкцыйных умовах, і, вядома, міжнароднай палітыцы. Пры гэтым кіраўнік дзяржавы ніколі не саромеўся гаварыць праўду, ён заўсёды падбірае такія словы, каб яны дайшлі да кожнага. І гэта вельмі важна, таму што сёння калектыўны Захад і яго прыхільнікі выставілі такую пазіцыю, якую можна назваць інфармацыйна-інфекцыйнай пандэміяй, такі своеасаблівы аналітычны вірус розумаў. Напэўна, у іх ужо закончылася дзеянне той прышчэпкі, якую ў 1945 годзе атрымалі. Відаць, імунітэт разважлівасці закончыўся ў іх. І кіраўнік нашай дзяржавы ўкажа на гэтыя моманты, бо тое, што апошнім часам адбываецца з падачы калектыўнага Захаду, розуму неспасціжна", - падзяліўся чаканнямі ён.
На думку субяседніка, закране кіраўнік дзяржавы і маючую адбыцца ў 2024 годзе выбарчую кампанію. Не абміне развіццё ўсіх галін, уключаючы культуру, спорт, а таксама дзейнасць грамадскіх арганізацый.
"Акцэнты расставіць і для работы парламента. Задачы будуць пастаўлены дакладныя для ўсіх галін улады і грамадскіх інстытутаў", - упэўнены Міхаіл Жукевіч.-0-
