23 мая, Мінск /Кар. БЕЛТА/. Выстаўка "Ахова здароўя Беларусі" адкрылася ў Мінску, перадае карэспандэнт БЕЛТА.
Адкрываючы гэты значны медыцынскі форум, міністр аховы здароўя Дзмітрый Піневіч заявіў, што няма нічога больш каштоўнага, чым здароўе. І на гэта нацэлены тыя дзяржавы, якія зацікаўлены ў сацыяльнай справядлівасці і ўсеагульным ахопе медыцынскімі паслугамі. Сёння на нарадзе па актуальных пытаннях аховы здароўя ў кіраўніка дзяржавы якраз і ішла аб гэтым размова.
Міністр лічыць вельмі знакавым тое, што выстаўка адкрываецца пасля нарады ў Прэзідэнта. Паводле слоў Дзмітрыя Піневіча, гэта пляцоўка будзе выкарыстана для паляпшэння якасці аказання медыцынскай дапамогі беларускім грамадзянам.
Выстаўка "Ахова здароўя Беларусі" - буйнейшае мерапрыемства ў рэгіёне ў галіне медыцыны і аховы здароўя, яно ўключае выстаўку і шырокую дзелавую праграму, прыцягвае вялікую колькасць беларускіх і замежных экспертаў. У выстаўцы прымаюць удзел больш за 150 арганізацый з васьмі краін свету. Прадстаўлены кампаніі з Беларусі, Венгрыі, Індыі, Ірана, Кітая, Расіі, Пакістана, Рэспублікі Карэя. Сярод іх вядучыя айчынныя і замежныя вытворцы медыцынскай тэхнікі, вырабаў медыцынскага прызначэння, расходных матэрыялаў, стаматалагічнага абсталявання і фармацэўтычнай прадукцыі.
Традыцыйна арганізавана насычаная дзелавая праграма: пройдзе звыш 30 навукова-практычных семінараў, канферэнцый і прэзентацый. А 24 мая адбудзецца Беларуска-індыйскі фармацэўтычны форум, у якім у тым ліку прымуць удзел прадстаўнікі індыйскіх кампаній-экспанентаў.-0-
