14 сакавіка, Мінск /Кар. БЕЛТА/. Вучні сярэдняй школы нумар 56 Мінска ў размове з карэспандэнтам БЕЛТА расказалі, чаму ўступілі ў ваенна-патрыятычны клуб "Пагранічнае братэрства".
Урачыстая цырымонія адкрыцця ваенна-патрыятычнага клуба "Пагранічнае братэрства" 13 сакавіка пачалася з прыняцця вучнямі школы прысягі. Дзеці пакляліся быць сумленнымі, дысцыплінаванымі, смелымі і мэтанакіраванымі. Пасля клятвы іх прынялі ў клуб. Дзеці з сярэдняй школы нумар 56 пачалі ўдзельнічаць у патрыятычнай дзейнасці задоўга да адкрыцця клуба. Адзінаццацікласнік Аляксандр Касімаў расказаў, што стаў займацца ваенна-патрыятычнай дзейнасцю ў 7-м класе, паколькі яму гэта цікава. А вучань 11-га класа Цімафей Рудніцкі ўспомніў, як пачалося яго захапленне. "Ігар Ігаравіч (Ігар Курган - кіраўнік ваенна-патрыятычнага клуба "Пагранічнае братэрства". - Заўвага БЕЛТА) падышоў і прапанаваў удзельнічаць у конкурсе "Зарніца". Мы, вядома, згадзіліся. Так і пачалі займацца. Ужо чатыры гады мінула, - падкрэсліў ён. - Нам вельмі падабаецца: пастаянна новыя эмоцыі. Пазнаёміліся са многімі людзьмі, шмат чаму навучыліся, напрыклад, як збіраць і разбіраць аўтамат Калашнікава. Планую звязаць жыццё з ваеннай службай".
Кіраўнік па ваенна-патрыятычным выхаванні школы Ігар Курган расказаў, якая работа праводзіцца сярод школьнікаў. "Наогул наша дзейнасць пачалася гадоў пяць таму, мы з дзецьмі сталі актыўна ўдзельнічаць ва ўсіх патрыятычных і ваенна-спартыўных мерапрыемствах. Ездзілі на ўскладанні кветак да помнікаў герояў. Пастаянна выязджалі на экскурсіі. Удзельнічалі ў ваенна-спартыўных гульнях "Зарнічка", "Зарніца", "Арляня", - адзначыў ён.
Школьнікі ўдзельнічаюць у спартыўна-патрыятычных гульнях і займаюць прызавыя месцы. "Дзецям падабаецца, яны актыўныя, - прадоўжыў Ігар Курган. - Таксама ездзім добраўпарадкоўваць памятныя мясціны, і дзеці натхнёныя. Кожны тыдзень мы настройваемся на нейкі выезд або запрашаем да сябе прадстаўнікоў воінскіх часцей".
З верасня 2021 года ва ўстановах агульнай сярэдняй адукацыі ўведзена пасада кіраўніка па ваенна-патрыятычным выхаванні. "І я на яе заступіў, пасля чаго з'явілася думка аб арганізацыі афіцыйнага клуба. Нарэшце, у гэтым годзе мы рэалізавалі ідэю", - дадаў Ігар Курган. Ён упэўнены, што сучасным дзецям гэта неабходна, каб яны памяталі і прымнажалі спадчыну дзядоў і прадзедаў.
Паводле слоў дырэктара школы Анжалікі Захарэўскай, ваенна-патрыятычны клуб важным лічаць усе педагогі школы і бацькі. "Самі дзеці загарэліся гэтым. Мы пашылі ім форму. Нядаўна наведвалі самую пажылую жыхарку раёна, якой споўнілася 100 гадоў. Дзеці часта запрашаюць да сябе малышоў і займаюцца з імі. Пішуць памятныя пісьмы, якія запячатваюць, каб праз гады прачытаць ужо сваім дзецям", - сказала яна.-0-
