19 мая, Мінск /Кар. БЕЛТА/. Як будзе арганізавана правядзенне вольнага часу гасцей Беларусі ў ходзе ІІ Гульняў краін СНД, расказала на прэс-канферэнцыі дырэктар дэпартамента па турызме Міністэрства спорту і турызму Ірына Варановіч, перадае карэспандэнт БЕЛТА.
"Нам выпаў вялікі гонар правесці ІІ Гульні краін СНД. Спаборніцтвы будуць праводзіцца не толькі ў сталіцы нашай краіны, але таксама яшчэ ў 11 гарадах Беларусі. Першыя гульні, якія праходзілі ў Казані, задалі нам высокую планку. У сувязі з гэтым нам неабходна найлепшым чынам паказаць свае арганізатарскія магчымасці, добра прыняць балельшчыкаў і спартсменаў, а таксама прадэманстраваць нашы новыя спартыўныя аб'екты і пляцоўкі", - адзначыла Ірына Варановіч.
Яна дадала, што стаіць важная задача - арганізаваць правядзенне вольнага часу гасцей нашай краіны.
"Важна паказаць турыстам культуру, асаблівасці і традыцыі нашых рэгіёнаў. У сувязі з гэтым мы падрыхтавалі турыстычныя пакеты ад аднаго да васьмі дзён з пераездамі па розных гарадах. Уся гэта інфармацыя даступная на сайце Нацыянальнага агенцтва па турызме, альбо ў адказных па абласцях тураператараў. Таксама рыхтуецца відэаролік, які будзе паказваць спартыўны турызм у Беларусі. Акрамя таго, на гэты момант у друку знаходзяцца брашуры з усёй інфармацыяй па аб'ектах размяшчэння, харчавання, спартыўных пляцоўках, а таксама іншых мерапрыемствах. На іх будуць размешчаны QR-коды, па якіх можна перайсці на сайты і атрымаць дадатковую інфармацыю", - расказала дырэктар дэпартамента па турызме Міністэрства спорту і турызму.
Паводле яе слоў, у турыстаў не будзе часу сумаваць, таму што кожны горад сур'ёзна рыхтуецца да ІІ Гульняў краін СНД. "Акрамя спартыўных мерапрыемстваў можна будзе наведаць тэатры, музеі, экалагічныя сцежкі і іншыя выдатныя мясціны. Нашы турысцка-інфармацыйныя цэнтры будуць працаваць ва ўзмоцненым рэжыме", - заявіла Ірына Варановіч.-0-
