20 студзеня, Мінск /Кар. БЕЛТА/. Праўленнем Беларускай натарыяльнай палаты ўстаноўлены даты правядзення ў 2023 годзе рэспубліканскіх акцый па бясплатным кансультаванні грамадзян і прадстаўнікоў бізнесу натарыусамі, паведамляе БЕЛТА са спасылкай на Нацыянальны прававы інтэрнэт-партал.
Натарыусы акажуць бясплатную прававую дапамогу напярэдадні дзяржаўных свят і іншых памятных дат: 15 сакавіка (да Дня Канстытуцыі Рэспублікі Беларусь), 5 мая (да Дня Перамогі), 30 чэрвеня (да Дня Незалежнасці Рэспублікі Беларусь), 15 верасня (да Дня народнага адзінства), 13 кастрычніка (да Дня маці і Дня бацькі), 1 снежня (да Дня юрыста).
Прыём у гэтыя дні будзе весціся ў адпаведнасці з устаноўленым графікам работы натарыяльных кантор і натарыяльных бюро.
Акрамя таго, плануецца правядзенне рэгіянальных акцый па бясплатным кансультаванні тэрытарыяльнымі натарыяльнымі палатамі.
У рамках акцый усе зацікаўленыя змогуць задаць пытанні, якія ўваходзяць у кампетэнцыю натарыуса, у тым ліку па афармленні спадчынных правоў, складанні завяшчанняў, шлюбных дагавораў, адчужэнні нерухомай маёмасці, ажыццяўленні выканаўчых надпісаў, засведчванні дагавораў адчужэння транспартных сродкаў, прадастаўленні электронных дакументаў для дзяржаўнай рэгістрацыі юрыдычных асоб або ІП ці ўнясенні змяненняў у статут (устаноўчы дагавор) натарыусам.
"Мэтай гэтых мерапрыемстваў з'яўляецца, перш за ўсё, забеспячэнне абароны правоў і законных інтарэсаў грамадзян, павышэнне ўзроўню правасвядомасці, прававой культуры і дасведчанасці насельніцтва", - адзначылі ў Беларускай натарыяльнай палаце.
Адрасы натарыяльных кантор і натарыяльных бюро, іх кантактныя тэлефоны і актуальныя графікі работы можна знайсці на сайце Беларускай натарыяльнай палаты.-0-
