21 верасня, Мінск /Кар. БЕЛТА/. У Мінску стартавала першая міжнародная спецыялізаваная выстаўка жыллёва-камунальнай гаспадаркі "Наш дом", перадае карэспандэнт БЕЛТА.
Як адзначыў міністр жыллёва-камунальнай гаспадаркі Андрэй Хмель, дасягненняў у сферы жыллёва-камунальнай гаспадаркі вельмі шмат. "Галіна няпростая, паколькі нашымі паслугамі карыстаецца кожны грамадзянін, арганізацыя і прадпрыемства без выключэння. На самай справе рэалізуецца вельмі шмат праграм, мерапрыемстваў, каб нашы грамадзяне лепш жылі. Таму і ўзнікла ідэя стварэння першай міжнароднай профільнай выстаўкі, якая, спадзяюся, стане штогадовай, будзе пашырацца і паляпшацца з кожным годам, як і ў цэлым галіна", - падкрэсліў ён.
Паводле слоў кіраўніка ведамства, для міністэрства важна чуць ад спажыўцоў як парады, так і крытыку. У рамках дзелавой праграмы мерапрыемства запланаваны круглыя сталы, навукова-практычныя канферэнцыі, семінары, прэзентацыі і рабочыя сустрэчы. "Аб'ектыўная крытыка нашых спажыўцоў дае магчымасць нам рухацца наперад. У сувязі з гэтым у рамках выстаўкі "Наш дом" адбудзецца восем круглых сталоў. Яны будуць разнапланавыя: абыходжанне з адходамі, эксплуатацыя жылога фонду, водазабеспячэнне, добраўпарадкаванне, адукацыя ў сферы ЖКГ і іншыя напрамкі дзейнасці галіны. На мерапрыемстве будуць выступаць значныя эксперты. Кожны можа прыняць удзел і выказаць сваё меркаванне", - расказаў міністр. Ён дадаў, што такія пляцоўкі часта прыносяць больш карысці, чым сама выстаўка, паколькі менавіта круглыя сталы дапамагаюць вырашаць тыя задачы, якія ставіць перад галіной урад і кіраўнік дзяржавы.
На працягу трох дзён на выстаўцы будуць прысутнічаць госці з Расіі, кампаніі з Латвіі, якія займаюцца кіраваннем жыллёвага фонду, эксперты з Венгрыі і іншых краін.
Гаворачы аб лічбавізацыі працэсаў у ЖКГ, кіраўнік ведамства адзначыў, што сёння развіваюцца розныя сэрвісы па аказанні ЖКП, напрыклад, 115.бел. "Гэты сэрвіс яшчэ ў пачатку свайго шляху, але, улічваючы ўсе крытычныя заўвагі, таксама будзе паляпшацца і ўдасканальвацца. Таксама мы рухаемся ў бок BIM-тэхналогій, развіваем праграмы па кіраванні жыллёвым фондам і іншыя. Міністэрства і ведамасныя арганізацыі ідуць у нагу з часам і не адстаюць ад трэндаў", - рэзюмаваў ён.
Міжнародная спецыялізаваная выстаўка жыллёва-камунальнай гаспадаркі "Наш дом" праходзіць у Мінску з 21 па 23 верасня ў выставачным цэнтры "БелЭкспа". Арганізацыі прэзентуюць абсталяванне, спецтэхніку, тэхналогіі ў галіне эксплуатацыі жыллёвага фонду, капітальнага і бягучага рамонту, інжынерных сетак, ліфтавай гаспадаркі, аўтаматызацыі і праграмнага забеспячэння прыбораў уліку і кантролю. Выстаўка праводзіцца як комплекс кангрэсна-выставачных мерапрыемстваў, накіраваных на стварэнне камунікацыйнага асяроддзя для абмеркавання і ўкаранення інавацыйных ідэй і распрацовак, прэзентацыі тэхнікі і абсталявання, абмену інфармацыяй і вопытам у сферы жыллёва-камунальнай гаспадаркі, а таксама ў мэтах шырокамаштабнага паказу высокатэхналагічных інавацыйных распрацовак і гатовых рашэнняў.-0-
