19 мая, Мінск /Кар. БЕЛТА/. Перад другім днём цэнтралізаванага экзамену, які пройдзе 21 мая, галоўнае пажаданне - праверыць наяўнасць пашпарта. Аб гэтым паведаміў у праекце БЕЛТА "Краіна гаворыць" намеснік міністра адукацыі Аляксандр Кадлубай.
"Ключавая рэч напярэдадні другога дня ЦЭ - адказнасць за наяўнасць дакумента, па якім выпускнік пройдзе на пункт цэнтралізаванага экзамену. Я арыентую бацькоў да 21 мая на тое, што калі вы вызначаеце свой летні адпачынак і вырашылі аддаць пашпарты на атрыманне замежнай візы ў пасольства або консульства, гэта не варта таго, каб потым ваша дзіця здавала экзамен у іншы тэрмін. На гэта неабходна звярнуць увагу для таго, каб такіх выпадкаў у нас у статыстыцы не было ў прынцыпе", - расказаў Аляксандр Кадлубай.
Намеснік міністра адзначыў, што сістэма адукацыі стварае са свайго боку максімальна камфортныя псіхалагічныя ўмовы для дзяцей. "Бацькам таксама варта паклапаціцца аб тым, каб іх дзіця было ў добрым настроі, трэба падтрымаць яго, гэта ніколі не будзе лішнім з боку сям'і. Калі размаўляеш з падлеткамі, разумееш, што ёсць розныя падыходы, часам бацькі залішне накручваюць адказнасць. Гэта не ідзе на карысць, вядомы выпадкі, калі ў пунктах правядзення ў дзіцяці падымалася тэмпература ад стрэсу. У нас, вядома, медыкі працуюць на пунктах, але бацькам варта ўзяць гэта пытанне на кантроль. Усіх астатніх я арыентую на такую ж зладжаную работу, якая была 14 мая", - рэзюмаваў ён.
Праект створаны за кошт сродкаў мэтавага збору на вытворчасць нацыянальнага кантэнту.-0-
