26 мая, Масква /Эдуард Півавар - БЕЛТА/. Напрамкі і перспектывы развіцця дзяржаўнай сістэмы падтрымкі сям'і ў Беларусі і Расіі стануць тэмай чарговага пасяджэння пастаянна дзеючага семінара пры Парламенцкім сходзе Саюза Беларусі і Расіі па пытаннях будаўніцтва Саюзнай дзяржавы. Мерапрыемства пройдзе 2-3 чэрвеня ў Мінску ў Доме Масквы, паведамілі БЕЛТА ў прэс-службе сходу.
"Удзельнікі пасяджэння абмяркуюць пытанні рэалізацыі дзяржаўнай сямейнай палітыкі Беларусі і Расіі, разгледзяць меры па ўмацаванні інстытута сям'і, захаванні духоўна-маральных традыцый, абмяняюцца думкамі па прыярытэтных напрамках развіцця дзяржаўнай падтрымкі матэрыяльнага становішча сем'яў, па аказанні дапамогі ў выхаванні дзяцей і забеспячэнні аховы здароўя сям'і ў Саюзнай дзяржаве", - сказалі ў прэс-службе.
Па выніках пасяджэння будзе распрацаваны дакумент з практычнымі рэкамендацыямі, што будзе накіраваны міністэрствам і ведамствам дзвюх дзяржаў, іншым зацікаўленым структурам.
У мерапрыемстве прымуць удзел дэпутаты Парламенцкага сходу, прадстаўнікі Пастаяннага камітэта Саюзнай дзяржавы, міністэрстваў аховы здароўя і міністэрстваў працы і сацыяльнай абароны Беларусі і Расіі, эксперты навуковых і адукацыйных устаноў дзвюх краін, а таксама прадстаўнікі маладзёжных аб'яднанняў і сродкаў масавай інфармацыі.
Пастаянна дзеючы семінар пры Парламенцкім сходзе Саюза Беларусі і Расіі па пытаннях будаўніцтва Саюзнай дзяржавы быў створаны па ініцыятыве саюзных парламентарыяў у 2006 годзе. Традыцыйна семінар збірае прадстаўнікоў навуковых колаў, прыхільнікаў інтэграцыі Беларусі і Расіі. Фармат мерапрыемства дазваляе дэталёва разгледзець актуальныя пытанні супрацоўніцтва Беларусі і Расіі ў рамках Саюзнай дзяржавы.-0-
