7 чэрвеня, Мінск /Кар. БЕЛТА/. У Палацы Незалежнасці прайшла экскурсія для маладзёжнага актыву Магілёва і Маларыцкага раёна Брэсцкай вобласці, паведамляе БЕЛТА.
У ліку экскурсантаў (усяго каля паўсотні чалавек) - члены грамадскіх аб'яднанняў, маладзёжных парламентаў, кіраўнікі школьнага самакіравання, выдатнікі вучобы, пераможцы і лаўрэаты абласных і рэспубліканскіх алімпіяд і конкурсаў. Разам з імі ў Палац Незалежнасці прыехалі таксама спецыялісты па рабоце з моладдзю, педагогі-арганізатары, лідары прафсаюзаў.
Аб сваім жаданні наведаць палац дзеці з Магілёва расказалі на сустрэчы з членам Савета Рэспублікі Нацыянальнага сходу Дзмітрыем Варанюком у 2022 годзе. Тады члены Маладзёжнага парламента пры Магілёўскім гарадскім Савеце дэпутатаў звярнуліся да сенатара з просьбай арганізаваць паездку ў Мінск, каб наведаць сімвал беларускіх суверэнітэту і незалежнасці. І вось 7 чэрвеня такую паездку ўдалося арганізаваць. Акрамя членаў Маладзёжнага парламента, на экскурсію прыехалі таксама кіраўнікі школьнага самакіравання, лідары Беларускага рэспубліканскага саюза моладзі, члены Лігі маладых аналітыкаў, спецыялісты па рабоце з моладдзю вядучых прадпрыемстваў Магілёва, члены маладзёжнага савета пры старшыні Магілёўскага гарвыканкама, педагогі-арганізатары, лідары прафсаюзаў і маладзёжнага крыла Беларускага саюза жанчын.
Група экскурсантаў з Маларыцкага раёна складаецца з матываваных, адукаваных і актыўных юнакоў і дзяўчат, якія ўдзельнічаюць у грамадскім жыцці раёна, адстойваюць яго гонар на розных спартыўных спаборніцтвах і культурных конкурсах, распрацоўваюць навуковыя праекты і ўдзельнічаюць у сацыяльна значных ініцыятывах. "Гэта патрыёты, члены розных грамадскіх аб'яднанняў, якія паважаюць сваю гісторыю, культуру і традыцыі, - характарызуюць іх у Маларыцкім раёне. - Яны падзяляюць духоўныя каштоўнасці, дакладна ўсведамляюць адказнасць не толькі за сябе, але і за сваіх бацькоў, бабуль і дзядуляў. Удзельнічаюць у розных валанцёрскіх праектах, студэнцкіх атрадах.-0-
