22 мая, Полацк /Алеся Пушнякова - БЕЛТА/. На сустрэчы з працоўным калектывам ААТ "Полацк-Шкловалакно" старшыня Савета Рэспублікі Наталля Качанава абмеркавала парадак дня і адказала на пытанні работнікаў прадпрыемства, перадае карэспандэнт БЕЛТА.
Старшыня Савета Рэспублікі пабывала ў вытворчых цэхах "Полацк-Шкловалакно", азнаёмілася з прадукцыяй і паразмаўляла з кіраўніцтвам завода.
На адным з буйнейшых прадпрыемстваў горада працуюць больш за 3 тыс. чалавек. Наталля Качанава акцэнтавала ўвагу на цяперашняй сітуацыі завода. "Адно з важных пытанняў, якія стаяць перад "Полацк-Шкловалакно", - рэалізацыя прадукцыі. Гэта прадукцыя сучасная, патрэбная, імпартазамяшчальная, і закупляць з-за мяжы такія тавары, калі мы можам самі іх вырабляць, няправільна. Праблему збыту мы абмяркуем з кіраўніцтвам завода, старшынёй аблвыканкама Аляксандрам Субоціным, прадстаўніком канцэрна "Белнафтахім" і пастараемся разам знайсці рашэнні па пошуку выйсця з гэтай няпростай сітуацыі. І дапамога павінна быць не толькі ад дзяржавы - кіраўніцтву завода і канцэрна трэба шукаць унутраныя рэзервы для развіцця прадпрыемства", - адзначыла старшыня Савета Рэспублікі.
Сустрэўшыся з калектывам "Полацк-Шкловалакно", Наталля Качанава расказала палачанам пра работу ўрада, дзяржаўныя праграмы, якія рэалізуюцца ў нашай краіне, у тым ліку па сацыяльнай падтрымцы. Яна падкрэсліла, як важна развіваць рэгіёны, падтрымліваць прадпрыемствы і працоўныя калектывы. "Тут развіта інфраструктура, ёсць магчымасці для росту. Да таго ж Полацк - гэта наша беларуская культурная Мека, тут зарадзілася наша дзяржаўнасць, у гэтым горадзе даволі высокі паток турыстаў, таму Полацк трэба падтрымліваць і развіваць", - адзначыла спікер.
Старшыня Савета Рэспублікі таксама абмеркавала з завадчанамі тэмы будаўніцтва жылля, у тым ліку арэнднага для маладых сем'яў і спецыялістаў, дэмаграфічнай сітуацыі ў краіне і тых выклікаў, з якімі сутыкнулася Беларусь апошнім часам. Перспектывы супрацоўніцтва ў нашай дзяржавы пашыраюцца, павялічваецца экспартны патэнцыял, ідзе пераарыентацыя рынкаў, і нават у такі час трэба шукаць магчымасці і займаць адкрытыя нішы, падкрэсліла спікер. Наталля Качанава дадала, што залогам дабрабыту як завода, так і краіны ў цэлым з'яўляецца адзінства, таму важна яго захаваць.-0-
