24 студзеня, Мінск /Кар. БЕЛТА/. Беларусы сур'ёзна рушылі наперад у справе давядзення праўды пра гістарычнае мінулае краіны, заявіла старшыня Савета Рэспублікі Наталля Качанава на выязным семінары "Рэспубліка Беларусь: ад вытокаў да сучаснасці (гістарычны шлях дзяржаўнага будаўніцтва)", перадае карэспандэнт БЕЛТА.
"Відавочна, што само па сабе рашэнне аб абвяшчэнні 2022 года Годам гістарычнай памяці з'яўляецца знакавым крокам не толькі для фарміравання дзяржаўнай гістарычнай палітыкі сучаснай Рэспублікі Беларусь, але і для развіцця беларускай дзяржаўнасці ў цэлым", - сказала Наталля Качанава.
Паводле слоў спікера, за мінулы год беларусы агульнымі намаганнямі сур'ёзна рушылі наперад у справе захавання гістарычнай памяці і давядзення праўды аб гістарычным мінулым Беларусі. Перш за ўсё - аб падзеях Вялікай Айчыннай вайны - важнейшай духоўнай скрэпе беларусаў, неад'емнай частцы нацыянальнай ідэі.
"Як ніколі выразна мы ўсвядомілі, што мала перамогу здабыць. Перамогу, а разам з ёю і права на самастойнае вызначэнне свайго лёсу, трэба ўмець адстаяць. Мы сталі значна актыўней дабівацца прызнання і асуджэння на міжнародным узроўні генацыду беларускага народа, а таксама ўмацоўваць добрыя дружалюбныя сувязі паміж нашчадкамі пераможцаў", - падкрэсліла Наталля Качанава.
У прыватнасці, грунтоўныя і адкрытыя выступленні парламентарыяў з Беларусі, Арменіі, Казахстана, Расіі, Таджыкістана, прадстаўнікоў Міжпарламенцкай асамблеі дзяржаў - удзельніц СНД, Парламенцкай асамблеі АДКБ, Парламенцкага сходу Саюза Беларусі і Расіі, дзяржаўных органаў, навуковай і экспертнай супольнасцей па гэтым пытанні адбыліся на палях міжнароднай парламенцкай канферэнцыі "Гістарычная памяць: Вялікая Перамога, здабытая адзінствам".
У мінулым годзе Савет Рэспублікі сумесна з Саветам Федэрацыі РФ упершыню рэалізаваў маладзёжны патрыятычны праект "Поезд Памяці", які кожны раз будзе прырастаць новымі ўдзельнікамі. У бягучым годзе плануецца сабраць моладзь з пяці дзяржаў Еўразійскага эканамічнага саюза, у 2024-м - з 10 краін Садружнасці Незалежных Дзяржаў, а да 80-годдзя Вялікай Перамогі - запрасіць удзельнікаў з 15 былых саюзных рэспублік, якія атрымалі Перамогу над фашызмам.
Наталля Качанава таксама нагадала, што сумесна з расійскімі калегамі было арганізавана пахаванне знойденых у Геленджыку астанкаў беларускага лётчыка Сцяпана Кавалёнка на яго Радзіме - у Бешанковіцкім раёне. І цяпер душа яшчэ аднаго героя нарэшце набыла вечны спачын.
Арганізатарам мерапрыемства выступае Савет Рэспублікі сумесна з Нацыянальнай акадэміяй навук Беларусі, Акадэміяй кіравання пры Прэзідэнце Рэспублікі Беларусь, Нацыянальным цэнтрам заканадаўства і прававых даследаванняў.
Семінар праходзіць на базе Акадэміі кіравання пры Прэзідэнце Рэспублікі Беларусь.-0-
