19 мая, Мінск /Кар. БЕЛТА/. Для прыняцця вывераных кіраўніцкіх рашэнняў важна аналітыка, заявіла старшыня Савета Рэспублікі Наталля Качанава на сустрэчы з калектывам Беларускага інстытута стратэгічных даследаванняў (БІСД), перадае карэспандэнт БЕЛТА.
Наталля Качанава падзякавала супрацоўнікам і кіраўніцтву інстытута за работу. Тая інфармацыя, якую прадстаўляюць эксперты, важная і цікавая, паколькі дае разуменне працэсаў, што адбываюцца. Яна звярнула ўвагу, што дырэктар БІСД Алег Макараў уваходзіць у склад экспертнага савета пры Савеце Рэспублікі, удзельнічае ў разглядзе законапраектаў.
"Важна разумець уздзеянне таго ці іншага пытання на грамадства, наколькі актуальна праблема, якую вырашаем, прымаючы той ці іншы нарматыўна-прававы акт. Важна не памыліцца", - адзначыла Наталля Качанава.
Калі ствараўся Беларускі інстытут стратэгічных даследаванняў адзначалася, што ў рэспубліцы не хапае такога цэнтра, які займаўся б аналітыкай, прагназаваннем па розных напрамках жыцця грамадства: у эканоміцы, сацыяльнай сферы, у развіцці рэгіёнаў, у рэалізацыі рашэнняў Усебеларускага народнага сходу, праграм сацыяльна-эканамічнага развіцця.
"Шчыра рада, што адкрыліся прадстаўніцтвы БІСД у рэгіёнах, - сказала Наталля Качанава. - Прымаемыя рашэнні павінны быць выпрацаваны, сістэматызаваны. Яны не павінны прымацца інстынктыўна. Інакш потым праблема можа праявіцца ў яшчэ большым маштабе".
Яна лічыць, што стварэнне БІСД - абсалютна правільнае, мудрае рашэнне. Асабліва актуальна дзейнасць інстытута з улікам змяненняў, якія адбываюцца ў свеце. "Трэба разуменне працэсаў, каб тонка дзейнічаць у інтарэсах сваёй краіны. Як заўсёды гаворыць Прэзідэнт, усе прымаемыя рашэнні павінны быць на карысць дзяржавы", - падкрэсліла Наталля Качанава.
У час сустрэчы адбылася прэзентацыя аналітычных праектаў. На сустрэчу запрошаны аналітыкі БІСД і кіраўнікі яго рэгіянальных аддзяленняў.
Беларускі інстытут стратэгічных даследаванняў (БІСД) з'яўляецца "фабрыкай думкі", заснаванай Прэзідэнтам 12 лютага 2019 года ў мэтах інфармацыйна-аналітычнага забеспячэння дзейнасці дзяржаўных органаў і службовых асоб па стратэгічных напрамках знешняй і ўнутранай палітыкі.-0-
