6 чэрвеня, Мінск /Кар. БЕЛТА/. Уступная кампанія пройдзе па тых правілах, якія былі вызначаны ў мінулым годзе. Аб гэтым расказаў журналістам міністр адукацыі Андрэй Іванец пасля нарады ў кіраўніка дзяржавы, перадае карэспандэнт БЕЛТА.
"Прэзідэнтам пастаўлена дакладная, ясная задача правесці гэту ўступную кампанію па тых правілах, якія былі ў мінулым годзе вызначаны, даведзены да грамадскасці", - сказаў міністр.
Разам з тым восенню Міністэрства адукацыі прааналізуе рэзультаты ўступнай кампаніі і па выніках будзе прынята рашэнне, у якім напрамку рухацца далей.
"Тая колькасць навацый, якую ў гэтым годзе мы апрабуем (гэта не толькі пытанне правядзення цэнтралізаванага экзамену, гэта асаблівы парадак прыёму мэтавікоў, калі яны здаюць унутраны вусны экзамен, гэта пашыраны набор адораных, таленавітых абітурыентаў, якія з'яўляюцца пераможцамі не толькі рэспубліканскіх, міжнародных прадметных алімпіяд, але і ўніверсітэцкіх алімпіяд, што прайшлі ва ўсіх рэгіянальных ВНУ, гэта выпускнікі Нацыянальнага дзіцячага тэхнапарка), вядома, патрабуе сур'ёзнага аналізу", - адзначыў Андрэй Іванец.
"Прэзідэнт даў усім дакладны і ясны пасыл: сістэма адукацыі павінна быць зразумелай, празрыстай, прынцыпы справядлівасці і роўных умоў павінны быць вытрыманы для ўсіх - і для навучэнцаў, і для бацькоў", - падкрэсліў міністр.-0-
