26 мая, Мінск /Кар. БЕЛТА/. Вучоныя Беларусі і РФ намецяць сумесныя дзеянні па прадухіленні фальсіфікацыі гісторыі. Аб гэтым заявіў сёння журналістам старшыня Прэзідыума НАН Уладзімір Гусакоў перад сумесным пасяджэннем прэзідыумаў Нацыянальнай акадэміі навук Беларусі і Расійскай акадэміі навук, перадае карэспандэнт БЕЛТА.
Асаблівая ўвага сёння будзе ўдзелена дзейнасці РАН і НАН Беларусі па захаванні гістарычнай памяці аб перамозе савецкага народа ў Вялікай Айчыннай вайне. "Мы будзем абмяркоўваць сумесныя дзеянні па прадухіленні фальсіфікацыі гісторыі Вялікай Айчыннай вайны. Будзем выпрацоўваць нашу агульную пазіцыю. Намецім шэраг мерапрыемстваў па гэтай тэматыцы (канферэнцый, круглых сталоў), будзем рыхтаваць выданні, праводзіць сумесныя даследаванні, паколькі гэта агульная трагедыя", - сказаў Уладзімір Гусакоў.
Для ўдзелу ў пасяджэнні ў Мінск прыехала прадстаўнічая дэлегацыя кіраўніцтва Расійскай акадэміі навук і вядомых вучоных Расіі на чале з прэзідэнтам РАН акадэмікам Генадзем Краснікавым. Гэта яго першы візіт у якасці новага кіраўніка РАН пасля выбараў, праведзеных у верасні 2022 года. У мерапрыемстве таксама прымаюць удзел дзяржаўны сакратар Саюзнай дзяржавы Дзмітрый Мезенцаў і прэзідэнт НДЦ "Курчатаўскі інстытут" Міхаіл Кавальчук.
Удзельнікі сумеснага пасяджэння прэзідыумаў РАН і НАН Беларусі разгледзяць шэраг важных пытанняў. Сярод іх - важнейшыя вынікі работы акадэмій навук па выніках 2021-2022 гадоў, ход рэалізацыі праграм Саюзнай дзяржавы з удзелам арганізацый РАН і НАН Беларусі і перспектыўных праектаў праграм, стратэгія навукова-тэхналагічнага развіцця Саюзнай дзяржавы.
Навуковая эліта дзвюх краін абмяркуе даследаванні і распрацоўкі ў галіне мікраэлектронікі ў РФ і Беларусі, праграму навукова-даследчых работ філіяла НДЦ "Курчатаўскі інстытут" у Беларусі, сумесныя беларуска-расійскія праекты ў рамках праграм Беларускага рэспубліканскага фонду фундаментальных даследаванняў і Расійскага навуковага фонду.-0-
