23 мая, Масква /Эдуард Півавар - БЕЛТА/. Беларускія дыпламаты высвятляюць абставіны знікнення турыстаў з Беларусі на Эльбрусе. Аб гэтым БЕЛТА паведамілі ў прэс-службе пасольства Беларусі ў Расіі.
"Аддзяленне пасольства Беларусі ў Растове-на-Доне высвятляе абставіны знікнення шасцярых беларускіх турыстаў на Эльбрусе, знаходзіцца ў кантакце з кампетэнтнымі органамі Расіі", - сказалі ў дыпмісіі.
Як паведамлялася БЕЛТА, у 9.20 23 мая ў дзяжурную службу Цэнтра кіравання ў крызісных сітуацыях Галоўнага ўпраўлення МНС Расіі па Карачаева-Чаркескай Рэспубліцы паступіла інфармацыя аб тым, што ў Карачаеўскім раёне, на заходнім схіле гары Эльбрус, прапала група турыстаў з 6 чалавек з Рэспублікі Беларусь. У падраздзяленнях МНС Расіі група не была зарэгістравана.
На пошукі выехала група ратавальнікаў МНС Расіі. Для пошуку турыстаў разглядаецца пытанне аб прыцягненні верталёта Мі-8.-0-
