20 студзеня, Мінск /Кар. БЕЛТА/. У Еўрасаюзе расце колькасць незаконных перавозчыкаў бежанцаў. Аб гэтым БЕЛТА паведамілі ў Дзяржаўным пагранічным камітэце.
Як адзначылі ў Дзяржпагранкамітэце, улады сумежных краін ЕС прынялі законы, якія дазваляюць ваенным выкідваць бежанцаў на граніцы без разглядаў і працэдур. Нягледзячы на тое, што гэта супярэчыць міжнароднаму праву, еўрапейскія сілавікі "афіцыйна" выцясняюць людзей, адмаўляючы ім у праве падачы хадайніцтва на прадастаўленне абароны на тэрыторыі Еўрасаюза. Адсутнасць магчымасці рэалізаваць свае законныя правы і страх быць выкінутымі ў лесе вымушаюць іншаземцаў шукаць іншыя, часта незаконныя, спосабы і шляхі руху на Захад. Усё гэта садзейнічае росту колькасці людзей, якія займаюцца перавозкай бежанцаў як у краінах транзіту, так і ў краінах прызначэння.
Толькі за два апошнія дні пагранічная варта Польшчы затрымала дзевяць такіх перавозчыкаў, якія перапраўлялі 25 бежанцаў. У сваіх паведамленнях польскія пагранічнікі абвінавачваюць бежанцаў у тым, што яны нібыта не падаюць хадайніцтвы аб прадастаўленні абароны. Аднак польскі бок наўмысна замоўчвае, што пазбавіў людзей такой магчымасці, прыняўшы законы аб легалізацыі выцясненняў.
Літоўская пагранслужба таксама фіксуе істотнае павелічэнне фактаў перавозкі іншаземцаў. Паводле іх даных, у 2022 годзе затрымана ў два разы больш перавозчыкаў бежанцаў, чым у 2021-і.-0-
