17 сакавіка, Мінск /Кар. БЕЛТА/. Міністр па надзвычайных сітуацыях Вадзім Сіняўскі сустрэўся з Надзвычайным і Паўнамоцным Паслом Аб'яднаных Арабскіх Эміратаў Ібрагімам Салімам Махамедам Аль-Мушарахам. Аб гэтым БЕЛТА паведамілі ў Міністэрстве па надзвычайных сітуацыях.
Вадзім Сіняўскі прадставіў асноўныя задачы і паспяхова рэалізуемыя напрамкі дзейнасці МНС, а таксама абазначыў гатоўнасць беларускага боку да абмену перадавым вопытам па шэрагу напрамкаў, уключаючы пытанні падрыхтоўкі ратавальнікаў і навучання насельніцтва асновам бяспекі. Пасол ААЭ адзначыў дружалюбны характар міждзяржаўных адносін паміж Беларуссю і Аб'яднанымі Арабскімі Эміратамі. Ён таксама пацвердзіў гатоўнасць арабскага боку аказваць усебаковую падтрымку Беларусі па розных напрамках двухбаковага ўзаемадзеяння.
У ходзе сустрэчы бакі абмеркавалі асноўныя напрамкі ўзаемадзеяння Беларусі і ААЭ, а таксама адзначылі неабходнасць надання практычнага імпульсу двухбаковаму супрацоўніцтву ў галіне абароны насельніцтва і тэрыторый ад надзвычайных сітуацый.
Па выніках сустрэчы Вадзім Сіняўскі прапанаваў паслу азнаёміцца з адукацыйнымі магчымасцямі Універсітэта грамадзянскай абароны МНС, а таксама наведаць адукацыйны цэнтр бяспекі МНС для азнаямлення з беларускім вопытам фарміравання культуры бяспекі жыццядзейнасці.-0-
