27 красавіка, Мінск /Аліна Грышкевіч - БЕЛТА/. Беларусь і Кітай за гады дыпламатычных адносін сталі надзейнымі партнёрамі і саратнікамі ў справе абароны разнастайнасці развіцця. Важнасць гэтага падкрэсліў Надзвычайны і Паўнамоцны Пасол КНР у Рэспубліцы Беларусь Се Сяаюн, выступаючы 27 красавіка на круглым стале на тэму "Унікальны шлях поспеху для ўсіх: кітайская Ініцыятыва глабальнай цывілізацыі", паведамляе карэспандэнт БЕЛТА.
"Кітай і Беларусь з'яўляюцца надзейнымі саратнікамі ў справе абароны разнастайнасці развіцця, садзейнічання абмену і супрацоўніцтву паміж рознымі краінамі, - сказаў дыпламат. - Прэзідэнт Беларусі Аляксандр Лукашэнка ў сваіх выступленнях на розных мерапрыемствах і Пасланні беларускаму народу і Нацыянальнаму сходу падкрэслівае неабходнасць абароны гістарычнай памяці, выказвае меркаванне, што нацыянальныя культуры і традыцыі нельга падагнаць пад адзіны стандарт, свет цудоўны ў сваёй разнастайнасці. Гэта пазіцыя ў многім сугучная з Ініцыятывай глабальнай цывілізацыі, вылучанай Старшынёй Сі Цзіньпінам, і мае на мэце адно і тое ж".
"З моманту ўстанаўлення дыпламатычных адносін 31 год таму, наколькі драматычна не мянялася б міжнародная абстаноўка, Кітай і Беларусь заўсёды падтрымліваюць дружалюбныя сувязі і пашыраюць абмены, - прадоўжыў Се Сяаюн. - Паміж двума бакамі значна вырас абмен студэнтамі: у пачатку ўстанаўлення дыпламатычных адносін гэта былі адзінкавыя выпадкі, а на сённяшні дзень у Беларусі вучыцца больш як 7 тыс. кітайскіх студэнтаў, а ў Кітаі праходзяць навучанне сотні беларускіх студэнтаў".
Пасол таксама нагадаў, што абведзве краіны стварылі культурныя цэнтры ў сталіцах адна адной. "У Беларусі добра працуюць заснаваныя Кітаем шэсць інстытутаў Канфуцыя і два класы Канфуцыя. Кітай і Беларусь сумесна правялі такія мерапрыемствы гуманітарнага абмену, як Год турызму, Год адукацыі, Вясёлае свята вясны, дні культуры, тыдні кіно, фотавыставы, семінары, мастацкія экспазіцыі, якія ўмацоўваюць узаемаразуменне і традыцыйную дружбу паміж двума народамі".
Се Сяаюн таксама адзначыў: "У ходзе дзяржаўнага візіту Аляксандра Лукашэнкі ў Пекін кіраўнікі дзвюх дзяржаў прынялі Сумесную заяву Кітайскай Народнай Рэспублікі і Рэспублікі Беларусь аб далейшым развіцці адносін усепагоднага і ўсебаковага стратэгічнага партнёрства паміж дзвюма краінамі ў новую эпоху. У дакуменце дакладна пазначана, што беларускі бок падтрымлівае прапанаваныя кітайскім бокам такія агульныя каштоўнасці чалавецтва, як мір, развіццё, роўнасць, справядлівасць, дэмакратыя і свабода, абодва бакі гатовы да далейшага ўмацавання гуманітарнага абмену і пашырэння супрацоўніцтва ў галіне культуры, турызму, спорту, кіно і тэлебачання. Гэта задало напрамак для далейшага ўмацавання кітайска-беларускага гуманітарнага супрацоўніцтва і абменаў".
"Старшыня КНР Сі Цзіньпін сказаў: "Адна кветка, якая распусцілася, - гэта яшчэ не вясна, а калі сто кветак распусцяцца разам, то вясна напоўніць сад". Кітай гатовы разам з міжнароднай супольнасцю, у тым ліку з Беларуссю, цвёрда стаяць на баку прагрэсу, прыкладаць сумесныя намаганні да рэалізацыі Ініцыятывы глабальнай цывілізацыі, пашыраць агульныя каштоўнасці", - заявіў пасол КНР у Беларусі.
На яго думку, вельмі важным з'яўляецца "збліжэнне народаў усіх краін свету, каб сад сусветных цывілізацый быў поўны фарбаў і жыццёвых сіл, а будучыня Супольнасці адзінага лёсу чалавецтва была яркай".-0-
