20 красавіка, Мінск /Кар. БЕЛТА/. Каардынацыя дзейнасці МЗС СНД на міжнароднай арэне сёння важна, як ніколі. Аб гэтым заявіў журналістам генеральны сакратар СНД Сяргей Лебедзеў, перадае карэспандэнт БЕЛТА.
"Сёння пастаянныя паўнамоцныя прадстаўнікі краін СНД сабраліся ў Мінску для таго, каб абмеркаваць вынікі праведзенага нядаўна ў Самаркандзе пасяджэння СМЗС. Гэта першая сустрэча міністраў замежных спраў у гэтым годзе. Павінен сказаць, што яна прайшла даволі рэзультатыўна. Абмяркоўваліся дзесяць пытанняў парадку дня. Пытанні важныя, цікавыя. У першую чаргу гэта пытанні ўзаемадзеяння знешнепалітычных ведамстваў краін Садружнасці. Сёння гэта вельмі актуальна. Усе, хто выступаў, аб гэтым гаварылі, што каардынацыя, узгадненне дзейнасці нашых міністэрстваў замежных спраў на міжнароднай арэне сёння важна, як ніколі. Асабліва важна ажыццяўляць гэта ў рамках міжнародных арганізацый", - адзначыў Сяргей Лебедзеў.
Чарговае пасяджэнне Савета пастаянных паўнамоцных прадстаўнікоў дзяржаў - удзельніц Садружнасці пры статутных і іншых органах СНД прайшло ў Мінску. На сустрэчы пастаянныя прадстаўнікі падвялі вынікі пасяджэння Савета міністраў замежных спраў Садружнасці Незалежных Дзяржаў, якое прайшло 14 красавіка ў Самаркандзе, і намецілі задачы па рэалізацыі прынятых на ім дакументаў і дасягнутых дамоўленасцей.
Члены СМЗС разгледзелі дзесяць пытанняў, сярод якіх арганізацыя спартакіяд краін СНД сярод дзяцей з абмежаванымі магчымасцямі здароўя, выкананне Плана шматузроўневых кансультацый паміж міністэрствамі і Праграмы дзеянняў па актывізацыі партнёрства паміж знешнепалітычнымі ведамствамі ў 2022 годзе, вызначэнне спартыўных сталіц Садружнасці на бліжэйшыя два гады і базавая арганізацыя па падрыхтоўцы і перападрыхтоўцы журналісцкіх кадраў.
Акрамя таго, Савет пастаянных прадстаўнікоў абмеркаваў вынікі рэалізацыі мерапрыемстваў, прысвечаных Году народнай творчасці і культурнай спадчыны ў Садружнасці Незалежных Дзяржаў.-0-
