ДЗЯРЖОРГАНЫДЗЯРЖОРГАНЫ
Субота, 30 мая 2020
Мінск Суцэльная воблачнасць +15°C
Усе навіны
Усе навіны
Палітыка
19 лютага 2020, 19:57

Беларусь імкнецца да развіцця поўнафарматных адносін з Японіяй - Дапкюнас

Андрэй Дапкюнас
Андрэй Дапкюнас

19 лютага, Мінск /Аліна Грышкевіч - БЕЛТА/. Беларусь імкнецца да развіцця поўнафарматных адносін з Японіяй. Аб гэтым заявіў намеснік міністра замежных спраў Андрэй Дапкюнас, выступаючы на ўрачыстым мерапрыемстве з нагоды дня нараджэння імператара Японіі, паведамляе карэспандэнт БЕЛТА.

Намеснік міністра падкрэсліў, што традыцыйны ўдзел кіраўніцтва МЗС у мерапрыемствах нацыянальных свят Японіі ў Беларусі з'яўляецца сведчаннем павагі да краіны, а таксама жадання імклівага развіцця поўнафарматных двухбаковых адносін. "Мы вельмі спадзяёмся ў гэтым на дружалюбны водгук японскага боку", - заўважыў Андрэй Дапкюнас.

"Сучасная Японія ва ўсім свеце выклікае дыялектычнае спалучэнне дзвюх станоўчых асацыяцый: краіна прагрэсу і краіна традыцый. Працавіты японскі народ дасягнуў значных рэзультатаў не толькі ў традыцыйных галінах эканомікі, але і ў распрацоўцы самых перадавых тэхналогій і інавацый", - прадоўжыў намеснік міністра. Разам з гэтым ён звярнуў увагу на імкненне японскага народа да захавання тысячагадовых традыцый і паважлівае стаўленне да гісторыі.

З моманту ўзыходжання на прастол у мінулым годзе імператара Японіі Нарухіта пачалася новая імперская эра Рэйва (у перакладзе азначае "парадак", "гармонія", а таксама "квітнеючы свет"). "Такая назва як мага лепш характарызуе сучасную Краіну ўзыходзячага сонца як дзяржаву, якая імкнецца да міру і росквіту, міжнароднага дыялогу і ўзаемадапамогі", - лічыць Андрэй Дапкюнас.

Ён звярнуў увагу, што беларускі і японскі народы звязвае шматгадовае сяброўства. "Мы памятаем і цэнім тую дапамогу і ўвагу, якія Японія аказала і прадаўжае аказваць Беларусі ў пераадоленні наступстваў аварыі на ЧАЭС. Японская праграма грантавай дапамогі "Карані травы" садзейнічае ўмацаванню сувязей паміж нашымі краінамі не толькі на міждзяржаўным, але і, што вельмі важна, на чалавечым, міжасобасным узроўні", - перакананы намеснік міністра.

Андрэй Дапкюнас падкрэсліў, што дзевяць гадоў таму ў Беларусі з болем было ўспрынята паведамленне аб здарэнні на японскай АЭС "Фукусіма". Бяда яшчэ больш аб'яднала беларускі і японскі народы.

"Партнёрскія адносіны паміж нашымі краінамі маюць вялікі патэнцыял, які можа быць рэалізаваны ў значным павелічэнні аб'ёму двухбаковага гандлю, стварэнні сумесных прадпрыемстваў, развіцці ўзаемавыгаднага навукова-тэхнічнага і інвестыцыйнага супрацоўніцтва, - упэўнены намеснік кіраўніка знешнепалітычнага ведамства. - Пры гэтым эканамічныя адносіны не павінны абмяжоўвацца выключна тэрыторыямі нашых краін. Беларусь як член ЕАЭС мае значныя магчымасці для сумесных праектаў на агульным рынку саюза".

Андрэй Дапкюнас перакананы, што гэты год стане знакавым для японскай гісторыі: "Дзякуючы багатаму вопыту Японіі ў правядзенні міжнародных спартыўных мерапрыемстваў Алімпійскія і Паралімпійскія гульні стануць яркай падзеяй 2020 года сусветнага маштабу".

Намеснік кіраўніка беларускага МЗС пажадаў імператару Японіі здароўя і даўгалецця, а японскаму народу - міру і росквіту. Ён таксама перадаў шчырыя пажаданні здароўя і даўгалецця бацьку імператара Японіі.

Нарухіта ўзышоў на імператарскі прастол 1 мая 2019 года. Яго бацька Акіхіта быў 125-м імператарам, правёў на троне амаль 30 гадоў і ў мінулым годзе прыняў беспрэцэдэнтнае рашэнне адрачыся добраахвотна, растлумачыўшы сваё жаданне ўзростам.

Дзень нараджэння імператара - дзяржаўнае свята ў Японіі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі