Сцяг Серада, 29 мая 2024
Усе навіны
Усе навіны
Эканоміка
01 сакавіка 2023, 15:37

Заяц: дзяржава гатова працаваць з фермерамі і закупляць прадукцыю для патрэбнасцей унутранага рынку

1 сакавіка, Мінск /Кар. БЕЛТА/. Дзяржава гатова працаваць з фермерамі і закупляць у іх прадукцыю для патрэбнасцей унутранага рынку. Аб гэтым журналістам заявіў намеснік прэм'ер-міністра Леанід Заяц у рамках нарады па пытанні стварэння дадатковых умоў забяспечанасці ўнутранага рынку агародніннай прадукцыяй за кошт фермерскага сектара, якая прайшла сёння ў Століне, паведамляе карэспандэнт БЕЛТА.

"Столінскі раён і фермерскія гаспадаркі гэтага рэгіёна знаходзяцца ў авангардзе па вытворчасці агародніны ў Беларусі. Як мінімум палова ўсёй агародніны вырошчваецца менавіта ў гэтым раёне. Нам вельмі важна забяспечыць унутраны рынак нашай краіны той прадукцыяй, якую мы закуплялі па імпарце, - ранняй бульбай, ранняй капустай, морквай і гэтак далей. У такія месяцы, як май, чэрвень, гэту прадукцыю мы прывозілі з Паўднёвай Азіі", - сказаў Леанід Заяц.

Паводле яго слоў, у фермераў Столінскага раёна ёсць усе магчымасці для вытворчасці гэтай прадукцыі ў сябе. "Таму мы разам з Міністэрствам антыманапольнага рэгулявання і гандлю, Белкаапсаюзам, з іншымі ведамствамі нашай краіны прыбылі сюды, каб на месцы ацаніць магчымасць фермерскіх гаспадарак, іх патэнцыял, аб'ёмы па відах прадукцыі, а таксама па тэрмінах пастаўкі, - паведаміў віцэ-прэм'ер. - Людзі гатовы паставіць каля 6 тыс. т ранняй капусты, 10 тыс. т морквы, 2 тыс. т ранняй бульбы і інш. Гэтыя аб'ёмы мы павінны закупіць у фермерскіх гаспадарак Столінскага раёна і прапанаваць сваім пакупнікам. Прычым па цане значна танней, чым мы завозім па імпарце. Якасць нашай прадукцыі ўсім вядома".

Ён адзначыў, што ў цэлым стаіць задача не толькі скупіць прадукцыю ў фермерскіх гаспадарак, але таксама закласці яе ў стабілізацыйныя фонды. "У Столінскім раёне неабходна будаваць сховішчы. Людзі гавораць, што маглі б захаваць значна больш прадукцыі, і па якасці яна будзе лепшай, чым тая, якую мы пастаўляем па імпарце. Таму мы будзем уносіць такія прапановы і разгледзім магчымасці кожнай фермерскай гаспадаркі. Мы павінны стварыць надзейныя ўмовы для захоўвання і наступнай рэалізацыі прадукцыі як на ўнутраным рынку, так і за межамі нашай дзяржавы", - канстатаваў намеснік прэм'ер-міністра.

Таксама будзе разгледжана магчымасць выдзялення на пэўных ільготных умовах крэдытных рэсурсаў для будаўніцтва неабходнай колькасці шкляных цяпліц. "Тым самым мы зможам замясціць пастаўку, напрыклад, агуркоў, з іншых краін сваімі айчыннымі і выйсці на ўнутраны рынак у міжсезонне - з лістапада па красавік, калі ў нас не вырошчваецца ў такіх аб'ёмах агароднінная прадукцыя", - адзначыў Леанід Заяц.-0-

Падпісвайцеся на нас у
Twitter
Топ-навіны
Свежыя навіны Беларусі