Сцяг Нядзеля, 19 мая 2024
Усе навіны
Усе навіны
Эканоміка
25 студзеня 2023, 18:30

Угнаенні і стымулятары росту: што беларускія вучоныя распрацоўваюць для сельскай гаспадаркі

25 студзеня, Мінск /Кар. БЕЛТА/. Загадчыца аддзела міжнародных сувязей, патэнтна-ліцэнзійнай і інфармацыйнай работы Інстытута прыродакарыстання НАН Беларусі Святлана Гапеева на палях выстаўкі навукова-тэхнічных дасягненняў "Беларусь інтэлектуальная" расказала карэспандэнту БЕЛТА аб распрацоўках для сельскай гаспадаркі.

На выстаўцы ад інстытута прадстаўлена ў асноўным прадукцыя на аснове торфу і сапрапелю. "У Беларусі торф - адзіны карысны выкапень, які ёсць у вялікай колькасці. Запасы яго разведаны, наш інстытут якраз займаецца разведкай запасаў торфу і ацэнкай тарфяных радовішчаў. Гэты выкапень бывае рознага віду і для некаторых прэпаратаў неабходны пэўны від торфу", - растлумачыла Святлана Гапеева.

На стэндзе інстытута прадстаўлены ўзоры грануляваных угнаенняў, стымулятараў росту раслін, а таксама прадукцыя для жывёлы. "Грануляваныя ўгнаенні - гэта мінеральныя апрацаваныя ўгнаенні, сумешчаныя з торфам. Яны маюць пралангаванае дзеянне і не вымываюцца першым дажджом, іх можна нанесці адзін раз у сезон і забыць. Арганіка раствараецца павольна за кошт таго, што ўтрымліваецца торфам. Ёсць у нас таксама сарбент ферацынзмяшчальны на аснове торфу, які выкарыстоўваецца ў асноўным для буйной рагатай жывёлы. Даказана, што пры наяўнасці торфу ферацын працуе ў два разы лепш. Акрамя гэтага, у нас ёсць лінейка стымулятараў росту раслін, якая пастаянна дапрацоўваецца і пашыраецца. Мы пачынаем дабаўляць розныя мікраэлементы, у асноўным гумінавыя кіслоты. Яны патрэбны ўсім раслінам і выкарыстоўваюцца для апырсквання і паліву", - расказала спецыяліст.

Таксама інстытут развівае вытворчасць актыўных вуглёў. "Яны ў Беларусі не вырабляюцца, а пастаўляюцца ў асноўным з Расіі. Цяпер распрацоўваем устаноўку для вытворчасці актыўных вуглёў, якія могуць быць выкарыстаны ў медыцынскай, харчовай прамысловасці і для тэхнічных патрэб пры ачыстцы вод і ўсяго астатняга", - дадала Святлана Гапеева.

Выстаўка навукова-тэхнічных дасягненняў "Беларусь інтэлектуальная" арганізавана ў мэтах выканання даручэння кіраўніка дзяржавы, дадзенага ў ходзе рабочай сустрэчы са старшынёй Прэзідыума НАН Беларусі Уладзімірам Гусаковым 18 кастрычніка 2022 года. Свае дасягненні і распрацоўкі дэманструюць вучоныя НАН Беларусі, прадстаўнікі ўстаноў адукацыі, навукова-даследчых дзяржаўных і прыватных арганізацый краіны, тэхнапаркаў, якія займаюцца навуковымі даследаваннямі. На выстаўцы прадстаўлена больш за 400 экспанатаў. Сярод іх натурныя ўзоры (у тым ліку буйнагабарытная тэхніка), макеты, мультымедыйныя прэзентацыі на вялікіх экранах.-0-

Падпісвайцеся на нас у
Twitter
Топ-навіны
Свежыя навіны Беларусі