Сцяг Серада, 24 красавіка 2024
Усе навіны
Усе навіны
Эканоміка
22 лютага 2024, 13:28

Пералік дазволеных у ЕАЭС харчовых дабавак зменшыцца

Фота з архіва
Фота з архіва
22 лютага, Масква /Эдуард Півавар - БЕЛТА/. Змяненні ў тэхнічны рэгламент Мытнага саюза на харчовыя дабаўкі, араматызатары і тэхналагічныя дапаможныя сродкі ўступяць у сілу 27 лютага, паведамілі БЕЛТА ў прэс-службе Еўразійскай эканамічнай камісіі.

Змяненні закрануць пяць раздзелаў тэхрэгламенту «Патрабаванні бяспекі харчовых дабавак, араматызатараў і тэхналагічных дапаможных сродкаў» і 29 дадаткаў да яго. «Уведзены пяць новых паняццяў, актуалізаваны шэраг азначэнняў, пералік дазволеных харчовых дабавак скарочаны з 362 да 349 за кошт выключэння 19 пазіцый і ўвядзення ў абарот шасці новых харчовых дабавак, - удакладнілі ў ЕЭК. - Значна пашыраны пералік смакаараматычных рэчываў для вытворчасці харчовых араматызатараў, для кожнага з якіх устаноўлена ўтрыманне асноўнага рэчыва, галіна прымянення і максімальны дапушчальны ўзровень утрымання ў харчовай прадукцыі".

Дакумент прыняты з улікам змяненняў, унесеных у міжнароднае і еўрапейскае заканадаўства, і ў сувязі з нарматыўнымі патрабаваннямі краін — гандлёвых партнёраў ЕАЭС. «Быў улічаны перадавы вопыт харчовых галін шэрага дзяржаў у адносінах да прымянення перспектыўных ферментных прэпаратаў, пералік якіх пашыраны з 56 да 331 пазіцыі. Галіна іх прымянення ўключае перапрацоўку агародніны і садавіны, вытворчасць малочнай, мясной, рыбнай, алкагольнай прадукцыі, хлебабулачных вырабаў, збожжавых прадуктаў, кавы, гарбаты і некаторых іншых тавараў», - адзначылі ў ЕЭК.
 
«З улікам паняційнага апарату, прадугледжанага ў тэхнічных рэгламентах на пэўныя віды харчовай прадукцыі, прынятых пасля ўступлення ў сілу названага тэхрэгламенту, а таксама з улікам уведзеных у дзеянне пасля 2013 года міждзяржаўных стандартаў, змяненнямі ўстаноўлены актуалізаваныя найменні для многіх відаў харчовай прадукцыі. Гэта істотна аблягчае працэдуру іх ідэнтыфікацыі. За кошт замацавання ў тэхрэгламенце на харчовыя дабаўкі, араматызатары і тэхналагічныя дапаможныя сродкі патрабаванняў бяспекі да шэрага новых харчовых дабавак, араматызатараў і тэхналагічных дапаможных сродкаў стане магчымым прымяненне новых тэхналогій вырабу сучасных харчовых прадуктаў», - звярнулі ўвагу ў ЕЭК.

Для змяненняў у тэхрэгламент прадугледжаны пераходны перыяд 36 месяцаў адносна дзеяння аформленых раней дакументаў аб ацэнцы адпаведнасці розных аб’ектаў тэхнічнага рэгулявання, а таксама іх вытворчасці, маркіроўкі і выпуску ў абарачэнне.-0-
Падпісвайцеся на нас у
Twitter
Топ-навіны
Свежыя навіны Беларусі