24 мая, Мінск /Кар. БЕЛТА/. Прэм'ер-міністр Беларусі Раман Галоўчанка назваў перспектыўныя напрамкі супрацоўніцтва на сустрэчы з кіраўніком Рэспублікі Карэлія Артурам Парфенчыкавым, паведамляе карэспандэнт БЕЛТА.
"У нас няма нязначных або другарадных тэм. Любы праект, які можа мець практычную карысць, заслугоўвае ўвагі і прапрацоўкі. Прывяду просты прыклад. Усе ведаюць пра мегапраект Рэспублікі Беларусь - гэта будаўніцтва атамнай электрастанцыі ў партнёрстве з карпарацыяй "Расатам". Сёння мы знаходзімся практычна на фінішнай прамой гэтага праекта. Першы энергаблок працуе ўжо на намінальнай магутнасці, другі - уключаны ў беларускую энергасістэму 13 мая 2023 года", - сказаў Раман Галоўчанка.
Паводле яго слоў, у Карэліі для аснашчэння БелАЭС былі набыты пажарныя робаты. "Гэта добры прыклад супрацоўніцтва ў сферы паставак высокатэхналагічнай прадукцыі. Менавіта з такіх цаглінак і фарміруецца фундамент супрацоўніцтва паміж Карэліяй і Беларуссю. І такіх прыкладаў шмат", - падкрэсліў прэм'ер-міністр.
У прыватнасці, Раман Галоўчанка назваў перспектыўным супрацоўніцтва ў галіне паставак тэхнікі для горназдабыўных і перапрацоўчых прадпрыемстваў. "Флагман беларускага машынабудавання БЕЛАЗ мае даўнюю гісторыю супрацоўніцтва з карэльскімі партнёрамі. Каля 150 кар'ерных самазвалаў эксплуатуюцца цяпер у Карэліі. Штогод ажыццяўляецца адгрузка новых партый, у тым ліку ёсць планы і на 2023 год", - адзначыў ён. Таксама будзе разгледжана пытанне павелічэння паставак грузавой тэхнікі МАЗ.
Беларускія прадпрыемствы актыўны ўдзел прымаюць у II Карэльскім міжнародным форуме каменеапрацоўкі "Карэлфорум-2023". "Яны павінны дасягнуць новых дамоўленасцей па пастаўках тэхнікі для карэльскіх прадпрыемстваў", - звярнуў увагу прэм'ер-міністр.
Акрамя таго, важныя напрамкі ўзаемадзеяння Беларусі і Карэліі - лясная прамысловасць, якая з'яўляецца вядучай галіной эканомікі гэтага расійскага рэгіёна, у тым ліку лесааднаўленне, лесаперапрацоўка. Таксама вялікія перспектывы ёсць у сферы турызму.
Акрамя таго, бакі абмяркуюць пытанні, якія датычацца будаўнічай сферы, узаемных паставак будматэрыялаў і інш.-0-
