Сцяг Нядзеля, 23 чэрвеня 2024
Усе навіны
Усе навіны
Эканоміка
21 мая 2024, 16:33

Падатковыя органы ў Беларусі штогод правяраюць каля 200 тыс. чалавек на адпаведнасць даходаў і расходаў

Фота з архіва
Фота з архіва
21 мая, Мінск /Кар. БЕЛТА/. Падатковыя органы штогод правяраюць каля 200 тыс. беларусаў на адпаведнасць даходаў і расходаў. Аб гэтым паведаміў на прэс-канферэнцыі начальнік галоўнага ўпраўлення падаткаабкладання фізічных асоб Міністэрства па падатках і зборах Андрэй Кавалеўскі, перадае карэспандэнт БЕЛТА.

"Праваахоўнікі, кантралюючыя органы ў першую чаргу арыентаваны на выяўленне суб'ектаў гаспадарання, якія выплачваюць зарплату ў канвертах, хаваюць выручку. Але мы добра разумеем, што канчатковая мэта вываду сродкаў у ценявы абарот - спажыванне, інакш кажучы, пакласці ў кішэнь службовай асобе або наёмнаму работніку, які спрабуе мінімізаваць падатковыя абавязацельствы перад дзяржавай і такім чынам максімізаваць свой прыбытак. У схеме задзейнічаны двое - і нядбайны наймальнік, які выплачвае зарплату ў канвертах, і работнік, які пагаджаецца, не разумеючы, што ў будучым страчвае розныя віды забеспячэння (пенсійнае, сацыяльнае) і магчымасць атрымання крэдытаў. Таму важным напрамкам па выяўленні зарплат у канвертах, выпадкаў утойвання даходаў, прымянення схем з'яўляецца кантроль за адпаведнасцю даходаў і расходаў фізічнай асобы. Штогадова падатковыя органы аналізуюць каля 200 тыс. грамадзян нашай краіны ў аўтаматычным рэжыме", - сказаў Андрэй Кавалеўскі.

Пры гэтым аналізуюцца даходы, заработная плата, набыццё рознай маёмасці, перамяшчэнне цераз граніцу транспартных сродкаў, валюты і г.д. Гэты масіў інфармацыі апрацоўваецца спецыяльна створанай камп'ютарнай сістэмай. Выяўляюцца тыя асобы, у якіх расходы значна перасягаюць даходы. "Вядома, у першую чаргу падатковыя органы арыентуюцца на такі аналіз адносна службовых асоб камерцыйных прадпрыемстваў, індывідуальных прадпрымальнікаў або тых, хто не працуе, але пры гэтым па нейкіх прычынах мае магчымасць набыць дарагую маёмасць. Такі кантроль ажыццяўляецца за перыяд 10 гадоў. Аналізуюцца ўсе даходныя крыніцы за гэты час і ўсе расходы", - адзначыў начальнік галоўнага ўпраўлення.

Калі расходы значна перасягаюць даходы, праводзіцца камеральная падатковая праверка. Фізічнай асобе прапануецца прадаставіць растлумачэнні аб крыніцах даходаў. "У большасці выпадкаў тыя асобы, якія былі адабраны для правядзення праверак, не могуць пацвердзіць легальнае паходжанне сваіх крыніц даходаў. Паводле статыстыкі за мінулы год, рэзультатыўнасць праверак - 70 працэнтаў, гэта значыць два чалавекі з трох правераных не могуць растлумачыць, адкуль узяліся даходы. Такім людзям пагражае падаткаабкладанне па павышанай стаўцы. Стаўка падаходнага падатку з сумы перавышэння расходаў над даходамі складае 26 працэнтаў - гэта ў два разы больш за асноўную стаўку", - звярнуў увагу прадстаўнік МПЗ.

"Па выніках праверак у 2023 годзе практычна 2,5 тыс. грамадзян так і не змаглі растлумачыць паходжанне сваіх даходаў. Агульная сума перавышэння расходаў над даходамі склала Br102 млн. Ім прад'яўлена да выплаты падаткаў на суму практычна Br29 млн. Гэта вялізны аб'ём, які сведчыць аб тым, як за апошнія 10 гадоў людзі спрабавалі выводзіць з легальнага абароту свае даходы. Прыкладаў вельмі шмат, у кожнай галіне", - рэзюмаваў Андрэй Кавалеўскі.-0-
Падпісвайцеся на нас у
Twitter
Топ-навіны
Свежыя навіны Беларусі