30 сакавіка, Мінск /Кар. БЕЛТА/. Змяненні ў падаткаабкладанні для бізнесу, унесеныя ў Падатковы кодэкс з 1 студзеня 2023 года, былі аб'ектыўна неабходны з улікам сітуацыі на рынку, заявілі ў Міністэрстве падаткаў і збораў. Такая інфармацыя размешчана ў часопісе "Налоги Беларуси", паведамляе БЕЛТА.
Змяненні выклікалі шэраг крытычных заўваг і пытанняў як з боку саміх прадпрымальнікаў, так і з боку грамадскіх бізнес-аб'яднанняў. У Міністэрстве па падатках і зборах у адказ на крытыку падкрэсліваюць: у аснове любых рашэнняў, якія датычацца падаткаабкладання, - і тых, што нясуць у сабе стымулюючы патэнцыял, і тых, што маюць адкрыта фіскальны характар, - закладзены адказ на аб'ектыўную рэальнасць. Дзяржава прымае такія рашэнні, адштурхоўваючыся ад жыцця, ад рэальных умоў. Так, за дзесяцігадовы перыяд змяненняў падатковага заканадаўства (з 2013 года) прымаўся шэраг прававых норм для зніжэння падатковай нагрузкі на бізнес, стымулявання прадпрымальніцкай актыўнасці. Цяпер прымаюцца меры для забеспячэння бюджэтнай устойлівасці.
Міністр па падатках і зборах Сяргей Налівайка нагадаў аб тым, што і спрошчаная сістэма падаткаабкладання, і адзіны падатак для ІП з'яўляюцца спецыяльнымі рэжымамі падаткаабкладання і ўводзіліся яны часова і з пэўнай мэтай. Гэта стварэнне ўмоў для развіцця малых форм бізнесу, падтрымка з боку дзяржавы на той перыяд, які спатрэбіцца ІП для пераходу на агульнаўстаноўленую сістэму падаткаабкладання. "На жаль, на працягу многіх гадоў мы назіралі, што гэтыя спецыяльныя рэжымы выкарыстоўваюцца не для станаўлення на ногі, а для атрымання неправамерных падатковых пераваг перад добрасумленнымі суб'ектамі гаспадарання. Таму і было прынята рашэнне спачатку скараціць віды дзейнасці для ІП, якія могуць ажыццяўляцца з прымяненнем спрошчанай сістэмы падаткаабкладання, а пачынаючы з бягучага года наогул адысці ад гэтых відаў дзейнасці", - адзначыў міністр.
Акрамя таго, так і не быў дасягнуты эфект, які быў галоўнай мэтай тых мер, што прымаліся дзесяць гадоў таму. "У 2013 годзе адбылося зніжэнне стаўкі па спрошчанай сістэме падаткаабкладання з 7 працэнтаў да 5 працэнтаў. І тады шэраг бізнес-саюзаў браў на сябе абавязацельствы стварыць не менш за 20 тыс. рабочых месцаў з заработнай платай $500. На працягу ўсяго гэтага часу ні аднаго года з такімі паказчыкамі няма. Больш таго, у ІП на сёння няма заработнай платы $500", - падкрэсліў Сяргей Налівайка.
Намеснік міністра па падатках і зборах Ігар Скрыннікаў зверыў стаўкі адзінага падатку з сумай падаходнага падатку, які ўтрымліваецца з заработнай платы сярэднестатыстычнага жыхара Мінска. "На працягу пяці гадоў сярэднестатыстычны грамадзянін выплачваў у сярэднім у 1,5 раза больш падаходнага падатку ў месяц, чым індывідуальны прадпрымальнік. Напэўна, гэта не зусім справядліва. Прычым мы вядзём размову аб самых вялікіх стаўках, якія былі ўстаноўлены для найбольш буйных гандлёвых цэнтраў", - звярнуў увагу ён.
На працягу многіх гадоў доля эканамічнага ўкладу індывідуальных прадпрымальнікаў у агульнае развіццё краіны вар'іравалася на ўзроўні 2-2,5 працэнта. Пры гэтым, як адзначыў намеснік міністра, ІП нярэдка станавіліся канкурэнтамі арганізаванага бізнесу, выкарыстоўваючы дысбаланс у падатковай нагрузцы сабе на карысць. Гэта прыводзіць да нядобрасумленнай падатковай канкурэнцыі. У мэтах мінімізацыі гэтага дысбалансу і выключэння множнасці падатковых рэжымаў дзяржава прыняла меры па карэкціроўцы падатковай палітыкі.-0-
