11 мая, Мінск /Кар. БЕЛТА/. На міжнароднай прамысловай выстаўцы "Інапрам" у Екацярынбургу Беларусь прадставіць практычна ўсе сектары эканомікі. Аб гэтым журналістам расказаў старшыня Беларускай гандлёва-прамысловай палаты Міхаіл Мятлікаў перад нарадай рабочай групы па падрыхтоўцы і правядзенні выстаўкі, перадае карэспандэнт БЕЛТА.
"Як краіна-партнёр Беларусь забудоўвае вялікую плошчу - больш за 3 тыс. кв.м, дзе будуць прадстаўлены практычна ўсе сектары эканомікі краіны, у першую чаргу прамысловы, станкабудаванне і іншыя", - расказаў Міхаіл Мятлікаў.
Выстаўка пройдзе ў Екацярынбургу ў ліпені. "На выстаўку прыязджае шмат дэлегацый і дзелавая праграма мерапрыемства насычаная. Паводле інфармацыі расійскага боку, чакаюцца госці з 50 краін. Гэта вельмі маштабнае мерапрыемства, - падкрэсліў старшыня. - З беларускага боку на ўдзел у экспазіцыі заявіліся флагманы беларускай прамысловасці, буйныя прадпрыемствы, малы бізнес, прыватны сектар і іншыя".
Асноўная тэма ў гэтым годзе - інавацыйнасць і кааперацыйнае ўзаемадзеянне, якое будзе рэалізавана ў будучым. "Будзе праходзіць шэраг форумаў, семінары, прэзентацыі. Што датычыцца кантрактаў, то яны заўсёды маюць адтэрмінаваны перыяд. Гэта выстаўка дасць вынікі ў перспектыве", - рэзюмаваў Міхаіл Мятлікаў.
Ён дадаў, што краінамі - партнёрамі выстаўкі з 2015 па 2022 год выступалі Кітай, Індыя, Японія, Карэя, Турцыя, Італія, Казахстан. У гэтым годзе краінай-партнёрам стала Беларусь.-0-
