14 красавіка, Мінск /Кар. БЕЛТА/. Цыркулярная эканоміка не можа функцыянаваць без падтрымкі экасістэм. Аб гэтым сказаў на прэс-канферэнцыі начальнік галоўнага ўпраўлення ўстойлівага развіцця Міністэрства эканомікі Сяргей Хрушчоў, паведамляе БЕЛТА.
Зялёная эканоміка традыцыйна вызначае праблему, цыркулярная ж накіравана на стварэнне інструментаў вырашэння экалагічных і энергетычных праблем. "Гэта значыць зялёная па сутнасці замяняе негатыўнае ўздзеянне выкапнёвага паліва больш экалагічна чыстымі альтэрнатывамі. У сваю чаргу цыркулярная прадаўжае жыццёвы цыкл прадукту, прадстаўляе сваю мадэль вытворчасці і спажывання, якая ўключае сумеснае выкарыстанне, рамонт, аднаўленне і перапрацоўку матэрыялаў, прадуктаў. Таму цыркулярная эканоміка ўбудавана ў прыроду і не можа функцыянаваць без накіраванасці на падтрымку экасістэм", - адзначыў Сяргей Хрушчоў.
Ён нагадаў, што адной з глабальных мэт устойлівага развіцця з'яўляецца адказнае спажыванне і вытворчасць. Згодна з апошнімі данымі, глабальная эканоміка з'яўляецца цыркулярнай толькі на 7,2 працэнта.
Начальнік упраўлення таксама назваў рэальныя вынікі руху краіны па ўкараненні прынцыпаў зялёнай эканомікі. У абыходжанні з адходамі - гэта сістэмы паасобнага збору бытавых адходаў, у зялёнай энергетыцы - будаўніцтва энергаўстановак, якія выпрацоўваюць цеплавую і электрычную энергію з аднаўляльных крыніц, у развіцці зялёнага транспарту - работы па вытворчасці і ўкараненні электратранспарту аўтамабільнага і чыгуначнага, у сельскай гаспадарцы - забеспячэнне экалагічна чыстай сыравінай і прадукцыяй іншых сектараў эканомікі. Таксама рэальным вынікам павінны паслужыць экалагічна бяспечная хіміка-біялагічная прамысловасць, прымяненне ў будаўніцтве энергаэфектыўных, рэсурсазберагальных, экалагічна бяспечных тэхналогій, адукацыя для ўстойлівага развіцця, экатурызм.
"Кожны з нас можа ўнесці ўклад як спажывец, таму што мы непасрэдна ўплываем на тое, якая эканамічная мадэль будзе развівацца ў нашым грамадстве. Калі мы набываем тавары доўгатэрміновага карыстання, рамантуем рэчы замест таго, каб адразу набываць новыя, практыкуем сумеснае карыстанне рэчамі, то мы ў цэлым аказваем уплыў на падтрымку цыркулярнай эканомікі", - рэзюмаваў Сяргей Хрушчоў.-0-
