ДЗЯРЖОРГАНЫДЗЯРЖОРГАНЫ
Флаг Субота, 28 студзеня 2023
Мінск -4°C
Усе навіны
Усе навіны
Эканоміка
28 лістапада 2022, 12:26

Кажамяка: эканоміка працуе ўстойліва, тавараабарот Беларусі і Прымор'я кратна павялічваецца

Фота з архіва
Фота з архіва

28 лістапада, Мінск /Кар. БЕЛТА/. Тавараабарот паміж Беларуссю і Прыморскім краем за тры гады вырас у 3,5 раза. Аб гэтым заявіў губернатар Прыморскага края Расіі Алег Кажамяка на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

"У цэлым сітуацыя ў нас развіваецца ў эканоміцы даволі нядрэнна", - сказаў кіраўнік рэгіёна. Паводле яго слоў, гэта звязана з тым, што цяпер вектар гандлю і паставак прадукцыі змяніўся на Усход і парты Прыморскага края атрымалі вялікую работу, нагрузку. Напрыклад, нядаўна праз парты Уладзівастока былі адпраўлены некалькі дзясяткаў кантэйнераў у інтарэсах беларускага вытворцы аўтамабіляў "Джылі".

"Пакуль у нас эканоміка працуе ўстойліва. Вядома, ёсць некаторыя пытанні, звязаныя з імпартазамяшчэннем. Але тым не менш мы іх таксама вырашаем", - адзначыў Алег Кажамяка. Ён звярнуў увагу, што тавараабарот паміж Беларуссю і Прыморскім краем за тры гады вырас у 3,5 раза, і паводле папярэдніх вынікаў за 2022 год відавочна, што ён вырасце яшчэ.

Значна павялічыліся пастаўкі ў Прыморскі край беларускіх прадуктаў харчавання, канстатаваў кіраўнік рэгіёна. Паводле яго слоў, яны выраслі ў восем разоў з 2019 па 2021 год. А па выніках 2022 года гэты рост будзе яшчэ больш істотным. "Прымарчане рассмакавалі беларускую прадукцыю", - сказаў ён.

Губернатар таксама адзначыў супрацоўніцтва з прамысловымі прадпрыемствамі. У прыватнасці за 10 месяцаў бягучага года Прыморскі край набыў прыкладна 109 адзінак тэхнікі, у тым ліку 21 аўтамабіль БЕЛАЗ грузападымальнасцю 130 тон. Прадаўжаецца работа па стварэнні сэрвіснага цэнтра, дзе на адной пляцоўцы будзе прадстаўлена каля 40 адзінак рознай тэхнікі беларускай вытворчасці.

Гандлёва-эканамічнае супрацоўніцтва Беларусі з Прыморскім краем Расіі апошнія гады дынамічна развіваецца. Тавараабарот павялічыўся з $17,3 млн у 2020 годзе да $32,7 млн у 2021-м. Па выніках 9 месяцаў гэтага года ён вырас яшчэ амаль на 80 працэнтаў у параўнанні з аналагічным перыядам мінулага года і склаў прыкладна $40 млн. Пры гэтым экспарт вырас больш чым удвая і дасягнуў $32,5 млн. Беларусь пастаўляе ў Прыморскі край у асноўным грузавыя аўтамабілі, спецыфічныя тавары, абсталяванне і ўстройствы для фільтравання вадкасцей і газаў, сыры і тварог, сметанковае масла і вяршкі, будаўнічыя дэталі з пластмас. Аснову імпарту з Прыморскага края склалі часткі і прылады для аўтамабіляў і трактароў, лекавыя сродкі, мука з мясных субпрадуктаў і рыбы, аксіды бору, электрычныя акумулятары.

Наладжана супрацоўніцтва расійскага рэгіёна са многімі прамысловымі прадпрыемствамі Беларусі. У прыватнасці, за 9 месяцаў гэтага года Мінскі электратэхнічны завод імя В.І.Казлова экспартаваў у рэгіён сілавыя трансфарматары на $1,6 млн (у 7,4 раза больш, чым за аналагічны перыяд мінулага года). Летам гэта беларускае прадпрыемства падпісала мемарандум з Усурыйскім аўтарамонтным заводам, паводле якога плануецца арганізаваць зборачную вытворчасць сілавых трансфарматараў у Прыморскім краі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі