ДЗЯРЖОРГАНЫДЗЯРЖОРГАНЫ
Флаг Субота, 28 студзеня 2023
Мінск -4°C
Усе навіны
Усе навіны
Эканоміка
06 снежня 2022, 13:38

Галоўчанка: узаемадапаўняльнасць эканомік Беларусі і ААЭ - спрыяльны фактар для развіцця супрацоўніцтва

Фота з архіва
Фота з архіва

6 снежня, Мінск /Кар. БЕЛТА/. Узаемадапаўняльнасць эканомік Беларусі і ААЭ - спрыяльны фактар для развіцця гандлёва-эканамічнага супрацоўніцтва. Аб гэтым сказаў прэм'ер-міністр Беларусі Раман Галоўчанка ў сваім віншаванні кіраўніцтву і народу Аб'яднаных Арабскіх Эміратаў з нацыянальным святам - Днём утварэння федэрацыі. З гэтай нагоды адбыўся афіцыйны прыём у пасольстве ААЭ у Мінску, паведамляе карэспандэнт БЕЛТА.

"За мінулыя з моманту свайго ўтварэння - 51 год - Аб'яднаныя Арабскія Эміраты сталі для ўсяго свету прыкладам таго, як эфектыўна выкарыстоўваць унутраныя магчымасці для ўсебаковага развіцця, гарманічна інтэгравацца ў сусветную эканоміку, захоўваючы пры гэтым унікальныя, самабытныя рысы, традыцыі культуры і дзяржаўнасці. Вядомыя сваім добразычлівым стаўленнем да ўсіх народаў і культур, а таксама шырокімі магчымасцямі для вядзення бізнесу, ААЭ ў перыяд цяперашняй палітычнай турбулентнасці прадаўжаюць заставацца донарам міру, бяспекі, а таксама месцам прыцяжэння не толькі турыстаў, але і бізнесменаў з усіх краін свету", - сказаў Раман Галоўчанка.

Паводле яго слоў, вясной гэтага года паспяхова завяршыла работу міжнародная выстаўка ЭКСПА, якая ўпершыню праходзіла на Блізкім Усходзе. Нягледзячы на сур'ёзныя цяжкасці, звязаныя з кавіднымі абмежаваннямі, складанасцямі ў сусветнай эканоміцы, дальнабачным лідарам ААЭ пры падтрымцы краін - удзельніц ЭКСПА, уключаючы Беларусь, удалося правесці гэта грандыёзнае мерапрыемства.

"У сувязі з пачаткам актыўнай фазы падрыхтоўкі да правядзення ў 2023 годзе ў Аб'яднаных Арабскіх Эміратах 28-й канферэнцыі ААН па змяненні клімату, хачу запэўніць нашых эмірацкіх партнёраў аб гатоўнасці Беларусі да ўсебаковай падтрымкі гэтага мерапрыемства, гэтак жа як і іншых стваральных ініцыятыў ААЭ ў рамках арганізацыі Аб'яднаных Нацый і на іншых міжнародных пляцоўках", - акцэнтаваў увагу кіраўнік беларускага ўрада.

Раман Галоўчанка адзначыў, што цяперашні кіраўнік ААЭ - шэйх Мухамед бен Заід аль-Нахаян - дастойна прадаўжае справу заснавальнікаў Аб'яднаных Арабскіх Эміратаў, якія сваёй галоўнай задачай абвяшчалі міралюбную палітыку і стварэнне максімальна спрыяльных умоў для працвітання краіны і яе жыхароў.

"Мы ўпэўнены, што шчырыя і адкрытыя адносіны паміж лідарамі нашых дзяржаў і ў далейшым будуць садзейнічаць развіццю ўзаемавыгаднага супрацоўніцтва паміж Беларуссю і ААЭ", - падкрэсліў ён.

Гаворачы аб двухбаковых адносінах паміж краінамі, прэм'ер-міністр звярнуў увагу на стабільна ўзрастаючы, узаемны інтарэс беларускага і эмірацкага бізнесу. "Узаемадапаўняльнасць эканомік нашых краін з'яўляецца спрыяльным фактарам для гандлёва-эканамічнага супрацоўніцтва. З задавальненнем адзначаю істотны рост аб'ёмаў знешняга гандлю ў гэтым годзе. Неабходна захаваць дасягнутую дынаміку і забяспечыць далейшае павелічэнне тавараабароту", - паведаміў ён.

Паводле слоў кіраўніка ўрада, Беларусь не толькі імкнецца выкарыстоўваць магчымасці ёмістага рынку ААЭ для экспарту тавараў і паслуг, але таксама выкарыстоўвае транспартна-лагістычныя перавагі паставак сваёй прадукцыі з ААЭ ў краіны Блізкага Усходу і Афрыкі. "Разлічваем на сустрэчныя ініцыятывы і эмірацкага бізнесу", - дадаў Раман Галоўчанка.

У бягучым годзе ў Беларусі прадоўжылася рэалізацыя флагманскага інвестыцыйнага праекта з удзелам эмірацкага капіталу - "Паўночны бераг". Прэм'ер-міністр запэўніў эмірацкі бок і ў далейшай усебаковай падтрымцы праекта з боку ўрада Беларусі. "Упэўнены, што мы зможам развіць гэты поспех і рэалізаваць сумесныя праекты ў іншых сферах, у тым ліку ў сельскай гаспадарцы, прамысловасці, турызме, медыцыне", - канстатаваў ён.

На заканчэнне выступлення Раман Галоўчанка працытаваў заснавальніка Аб'яднаных Арабскіх Эміратаў - шэйха Зайда ібн Султана аль-Нахаяна, які некалі сказаў: "Мы адчуваем сябе людзьмі, якія забраліся на вяршыню гары. Але калі мы кідаем позірк да яе падножжа, нам хочацца падняцца яшчэ вышэй і дасягнуць новых вышынь. Таму, нягледзячы на ўсе нашы дасягненні, мы прадаўжаем імкнуцца да большага". Лічу, што гэтыя мудрыя словы вялікага чалавека павінны стаць дэвізам і для беларуска-эмірацкіх адносін. Мы не павінны спыняцца на дасягнутым і абавязаны ўсямерна развіваць наша ўзаемавыгаднае супрацоўніцтва і прымнажаць яго вынікі".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі