20 студзеня, Мінск /Кар. БЕЛТА/. Вядучыя інстытуты Дзяржстандарту прадэманструюць навукова-тэхнічныя дасягненні на выстаўцы "Беларусь інтэлектуальная", якая пройдзе на базе Нацыянальнага выставачнага цэнтра "БелЭкспа" 20-22 студзеня, паведамілі карэспандэнту БЕЛТА ў прэс-службе камітэта.
Свае дасягненні і распрацоўкі прадэманструюць вучоныя Нацыянальнай акадэміі навук Беларусі, прадстаўнікі ўстаноў адукацыі, навукова-даследчых дзяржаўных і прыватных арганізацый краіны, тэхнапаркаў, якія займаюцца навуковымі даследаваннямі. Усяго на выстаўцы будзе прадстаўлена больш за 400 экспанатаў, у тым ліку буйнагабарытная тэхніка.
У рамках выстаўкі навукова-тэхнічныя дасягненні прадэманструюць і вядучыя інстытуты Дзяржстандарту. Так, Беларускі дзяржаўны інстытут метралогіі (БелДІМ) прадставіць нацыянальныя эталоны адзінак каэфіцыента і вугла маштабнага пераўтварэння сінусаідальнага напружання і току і адзінкі даўжыні ў нанаметровым дыяпазоне. Новыя распрацоўкі створаны ў 2021-2022 гадах у рамках рэалізацыі дзяржаўнай навукова-тэхнічнай праграмы "Эталоны Беларусі".
"Нацыянальны эталон адзінак каэфіцыента і вугла маштабнага пераўтварэння сінусаідальнага напружання і току прызначаны для правядзення метралагічнай ацэнкі трансфарматараў напружання да 330 кВ і току 15 кА. Раней паверка, каліброўка такіх трансфарматараў на тэрыторыі рэспублікі не праводзілася: суб'екты гаспадарання вымушаны былі звяртацца за мяжу і несці вялікія фінансавыя і часавыя затраты. Цяпер эталон з'яўляецца запатрабаваным з прычыны развіцця электраэнергетычнай галіны краіны, а таксама ўвядзення ў эксплуатацыю Беларускай АЭС", - расказалі ў прэс-службе.
Як адзначылі ў камітэце, фарміраванне нанаіндустрыі патрабуе стварэння спецыялізаванай інфраструктуры, якая забяспечвае адзінства вымярэнняў у гэтай сферы, а таксама аснашчэнне яе адпаведнай прыборнай базай. З такой мэтай быў распрацаваны нацыянальны эталон адзінкі даўжыні ў нанаметровым дыяпазоне. Неабходнасць у яго стварэнні абумоўлена запатрабаваннямі эканомікі і прамысловасці рэспублікі, у першую чаргу ў мікраэлектроніцы, якая выпускае адпаведную прадукцыю.
Беларускі дзяржаўны інстытут стандартызацыі і сертыфікацыі (БелДІСС) прадэманструе 3D-мадэль радыёбезрэхавай камеры для выпрабаванняў прамысловай прадукцыі і транспартных сродкаў, у тым ліку буйнагабарытных, па параметрах электрамагнітнай сумяшчальнасці. Яны неабходны для пацвярджэння адпаведнасці прадукцыі абавязковым патрабаванням з мэтай доступу на рынак ЕАЭС і іншых краін, а таксама павышэння яе тэхнічнага і інавацыйнага ўзроўню.
Радыёбезрэхавая камера дае магчымасць праводзіць выпрабаванні транспартных сродкаў і абсталявання з памерамі 20х4х4 м і масай да 20 т. У ёй, напрыклад, размяшчаецца самы вялікі з вырабляемых на тэрыторыі Беларусі сучленены электробус.
"Гэта выпрабавальная пляцоўка была створана ў рамках дзяржаўнай інвестпраграмы ў канцы 2020 года і з'яўляецца ўнікальнай не толькі ў нашай краіне, але і на постсавецкай прасторы. Яе функцыянаванне істотна скарачае затраты айчынных прадпрыемстваў, якія раней былі вымушаны праводзіць выпрабаванні сваёй прадукцыі за мяжой. Напрыклад, за мінулы час у радыёбезрэхавай камеры ўжо пратэсціравана больш за сотню транспартных сродкаў і аўтамабільных кампанентаў, вырабленых у Беларусі, Расійскай Федэрацыі, Кітаі, Кыргызстане. Наяўнасць у краіне сучаснай выпрабавальнай базы і яе пастаяннае ўдасканаленне асабліва актуальна ва ўмовах санкцыйных абмежаванняў", - падкрэслілі ў прэс-службе.
Выстаўка навукова-тэхнічных дасягненняў "Беларусь інтэлектуальная" пройдзе 20-22 студзеня на базе Нацыянальнага выставачнага цэнтра "БелЭкспа". Для наведвальнікаў свабодны ўваход на выстаўку 21-22 студзеня з 10.00 да 17.00.
Экспазіцыя арганізавана па кластарным прынцыпе: штучны інтэлект, IT-тэхналогіі, робататэхніка; інавацыйнае прыборабудаванне; электратранспарт і яго базавыя кампаненты, лятальныя апараты; абараназдольнасць і ваенная навука; экалогія, прыродакарыстанне; біятэхналогіі; фармацыя, ахова здароўя, медыцына; аграпрамысловы комплекс, прадукты харчавання; прастора маладзёжных ініцыятыў.
Мэта мерапрыемства - дэманстрацыя найноўшых навуковых распрацовак беларускіх вучоных і студэнтаў, а таксама прапаганда дасягненняў навукі, арыентаваная на шырокую аўдыторыю прадстаўнікоў усіх слаёў беларускага грамадства.
Выстаўка арганізавана ў выкананне даручэння кіраўніка дзяржавы, дадзенага ў ходзе рабочай сустрэчы са старшынёй прэзідыума Нацыянальнай акадэміі навук Беларусі Уладзімірам Гусаковым 18 кастрычніка 2022 года.-0-
