24 мая, Мінск /Кар. БЕЛТА/. Доля экспарту беларускай кандытарскай прадукцыі ў мінулым годзе дасягнула 35 працэнтаў. Аб гэтым на ІІ Міжнародным сімпозіуме кандытараў Food Prom Confectionary заявіў журналістам старшыня канцэрна "Белдзяржхарчпрам" Алег Жыдкоў, перадае карэспандэнт БЕЛТА.
Паводле яго слоў, у мінулым годзе ўсе прадпрыемствы кандытарскай галіны паказалі добрыя вынікі фінансава-гаспадарчай дзейнасці як па выручцы, так і па прыбытковасці. "Значны ўплыў на гэта аказаў вартасны фактар, паколькі многія прадпрыемствы вырашылі павялічыць адпускную цану гатовага вырабу, перш за ўсё для экспартнага напрамку. Адзначу, што ў Беларусі цана кантралявалася на ўсіх этапах фарміравання і практычна не павялічылася. У мінулым годзе доля экспарту кандытарскай прадукцыі за мяжу дасягнула 35 працэнтаў, пры гэтым 84 працэнты прыпала на долю расійскага рынку. Усё гэта дало магчымасць нам паспяхова спрацаваць і атрымаць эфект у выглядзе прыросту выручкі і рэнтабельнасці. Мы стварылі сапраўды добры зачын для таго, каб у гэтым годзе прадаўжаць працаваць з такімі ж тэмпамі, інвесціраваць у развіццё фабрык і ствараць самыя сучасныя і тэхналагічна перадавыя вытворчасці", - расказаў старшыня "Белдзяржхарчпрама".
Гаворачы аб мадэрнізацыі вытворчасці, ён адзначыў, што ў гэтай сферы ёсць пэўныя цяжкасці, таму што абсталяванне еўрапейскае. "Мы прадаўжаем супрацоўнічаць з еўрапейскімі партнёрамі, але пры гэтым не можам не адзначыць змяненне тэрмінаў вырабу абсталявання, пастаўкі і кошту. Калі раней ад пачатку праектавання да ўводу ў эксплуатацыю мы ўкладваліся ў 6-12 месяцаў, то цяпер гэтыя тэрміны падаўжаюцца да 18-24 месяцаў. Таму прапрацоўваем варыянты супрацоўніцтва і з іншымі краінамі, напрыклад з Турцыяй і Кітаем", - дадаў Алег Жыдкоў.
Міжнародны сімпозіум кандытараў праходзіць у Мінску 24-25 мая. Мерапрыемства аб'яднала кіраўнікоў, спецыялістаў кандытарскай і сумежных галін з Беларусі і краін замежжа. На сімпозіуме будуць праходзіць дыскусіі, круглыя сталы і нефармальныя сустрэчы. Мерапрыемства ставіць перад сабой задачы па вырашэнні пытанняў інтэграцыі, практычнага ўзаемадзеяння, абмену вопытам, перспектыў развіцця кандытарскай галіны, азнаямлення з інавацыямі галіны і дасягненнямі ў сферы тэхналогій і абсталявання, наладжвання прамых кантактаў з вытворцамі, рэтэйлам і пастаўшчыкамі, папулярызацыі айчынных тавараў і пошуку шляхоў павышэння экспартнага патэнцыялу.-0-
