Сцяг Серада, 29 мая 2024
Усе навіны
Усе навіны
Эканоміка
14 лютага 2023, 11:56

БУТБ будзе супрацоўнічаць з ГПП Татарстана

14 лютага, Мінск /Кар. БЕЛТА/. Беларуская ўніверсальная таварная біржа будзе супрацоўнічаць з саюзам "Гандлёва-прамысловая палата Рэспублікі Татарстан", паведаміў карэспандэнту БЕЛТА прэс-сакратар БУТБ Раман Яніў.

Беларуская ўніверсальная таварная біржа і саюз "Гандлёва-прамысловая палата Рэспублікі Татарстан" плануюць сумесна ўключаць суб'екты малога і сярэдняга прадпрымальніцтва ў біржавы гандаль. Такая дамоўленасць дасягнута па выніках візіту ў цэнтральны офіс БУТБ дэлегацыі дзелавых колаў гэтага рэгіёна Расіі. У склад бізнес-місіі ўвайшлі кіраўнікі і топ-менеджары вядучых прамысловых прадпрыемстваў Татарстана з розных галін - ад вытворчасці электраабсталявання і металавырабаў для інжынерных сетак да вырабу палімерных матэрыялаў і паставак спецтэхнікі для нафтагазавага сектара.

Адным з прыярытэтных напрамкаў узаемадзеяння БУТБ з ГПП Татарстана стане правядзенне інфармацыйнай кампаніі, накіраванай на павышэнне інфармаванасці татарстанскага бізнесу аб магчымасцях беларускай біржавой пляцоўкі. Пры гэтым, на думку намесніка старшыні татарстанскай ГПП Марата Ахматава, асаблівую ўвагу неабходна ўдзяліць практычным аспектам удзелу ў біржавых таргах, а таксама перавагам, якія прадастаўляе гэты механізм.

"Як гандлёва-прамысловая палата мы прадстаўляем інтарэсы некалькіх тысяч кампаній, і гэта вялікая адказнасць. Таму мы стараемся рэкамендаваць толькі тыя інструменты, якія сапраўды працуюць і прыносяць канкрэтную карысць. Дык вось ваша гандлёвая пляцоўка мае шэраг каштоўных пераваг для татарстанскіх прадпрыемстваў, якія, мы спадзяёмся, не толькі спросцяць выхад на беларускі рынак, але і адкрыюць доступ на рынкі іншых краін, прадстаўленых на біржы", - адзначыў Марат Ахматаў.

Прапанову татарстанскага боку падтрымаў намеснік міністра антыманапольнага рэгулявання і гандлю Беларусі Андрэй Картун. Паводле яго слоў, апошнім часам тэма біржавога гандлю ў абавязковым парадку ўключаецца ў праграмы многіх беларуска-расійскіх бізнес-форумаў. Аднак у ходзе такіх маштабных дзелавых мерапрыемстваў, у тым ліку з удзелам вышэйшых службовых асоб, не заўсёды ёсць магчымасць глыбока ўнікнуць у нюансы прымянення біржавога механізма.

"У сувязі з гэтым вельмі важна арганізоўваць B2B-сустрэчы, вочныя і анлайн-семінары, знаёміць бізнес з патэнцыялам біржавой пляцоўкі. Як паказвае практыка, менавіта такая форма работы забяспечвае максімальную эфектыўнасць", - падкрэсліў намеснік міністра МАРГ.

У сваю чаргу старшыня праўлення БУТБ Аляксандр Асмалоўскі акцэнтаваў увагу на ўніверсальнасці біржавой платформы, якая аб'ядноўвае ў сабе шырокі пералік інструментаў і сэрвісаў, што аблягчаюць вядзенне знешнегандлёвай дзейнасці.

"Прыходзячы на біржу, татарстанская кампанія, па сутнасці, атрымлівае магчымасць гандляваць больш як з 24 тыс. беларускіх прадпрыемстваў. Такой высокай канцэнтрацыі патэнцыяльных дзелавых партнёраў не забяспечыць ні адзін маркетплэйс. Акрамя таго, мы ад пачатку да канца суправаджаем кожную здзелку, што робіць біржу запатрабаваным сродкам хеджыравання рызык. Дарэчы, гэтым актыўна карыстаюцца расійскія ўдзельнікі таргоў, заключаючы транзітныя здзелкі з рэзідэнтамі трэціх краін і нават з кампаніямі з суседніх рэгіёнаў Расіі. Па выніках мінулага года сума такіх транзакцый склала каля $13 млн. Такім чынам, біржа комплексна вырашае ўсё кола пытанняў міжнароднага гандлю", - рэзюмаваў Аляксандр Асмалоўскі.

ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з найбуйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-

Падпісвайцеся на нас у
Twitter
Топ-навіны
Свежыя навіны Беларусі